Жорий йилнинг 20 октябрь куни Энергетика вазири Алишер Султанов ва “Ўзбекнефтгаз” АЖ раҳбарияти ҳамроҳлигида “СИБУР Холдинг” ОАЖ бошқарув Кенгаши раиси Дмитрий Конов бошчилигидаги делегация аъзолари Қашқадарё вилоятидаги Шўртан газ кимё мажмуасига (ШГКМ) ташриф буюрди.
Ташриф давомида делегация вилоятда амалга оширилаётган йирик инвестиция лойиҳалар, жумладан ШГКМда ишлаб чиқариш қувватини кенгайтириш лойиҳасини амалга ошириш жараёнлари билан танишди.
Ушбу лойиҳанинг мақсади – GTL заводидан олинадиган йилига 430 минг тонна синтетик нафтани қайта ишлаш орқали полиэтилен ишлаб чиқариш ҳажмини қўшимча 280 минг тонна, полипропилен ҳажмини йилига қўшимча 100 минг тонна, пиролиз дистилляти ва мой ҳажмларини йилига қўшимча 50 минга ошириш ҳисобланади. Делегация аъзолари ушбу лойиҳани амалга ошириш жараёнлари билан танишдилар.
Мажмуада мавжуд қурилмаларни реконструкция қилиш ва янги технологик тармоқларни қуриш натижасида мажмуанинг полимер маҳсулотлари ишлаб чиқариш қуввати йилига 505 минг тоннага етказилади.
Мажмуанинг асосий ишлаб чиқариш жараёнлари – Этилен ва Полиэтилен ишлаб чиқариш цехи ҳисобланади. Ишлаб чиқариш қурилмалари замонавий назорат-ўлчов асбоблари ва технологик жараёнларни автоматлаштириш воситалари билан жиҳозланган бўлиб, шу орқали маҳсулотнинг сифати назорат қилиб борилади.
Мажмуда йилига 3,9 млрд. куб метргача хом ашё гази, 3,5 млрд. куб метргача товар гази, 125 минг тоннадан ортиқ полиэтилен грануласи, 100 минг тоннадан ортиқ суюлтирилган газ, 100 минг тоннадан ортиқ газ конденсати, 1,5 минг тонна олтингугурт грануласи, 750 минг кв метрдан ортиқ алюмин композитли панеллар, 4,5 минг тоннадан ортиқ полиэтилен қувурлар, шланглар, уловчи қисм (фитинг)лар ва томчилаб суғориш тизимлари ва бошқа турдаги маҳсулотлар ишлаб чиқарилади.
Шунингдек, яна бир асосий маҳсулот бу – суюлтирилган газ бўлиб, у нефть маҳсулотларига қараганда экологик тоза ёқилғи тури саналади. Шунингдек, мажмуада техник газли гранулаланган олтингугурт ишлаб чиқарилиб, 25 килограммли полиэтилен қопларга жойланади.
“СИБУР Холдинг” ОАЖ делегацияси Ўзбекистонда углеводород хом ашёсини чуқур қайта ишлаш соҳасида амалга оширилаётган ушбу ўзгаришлар ва нефть кимёсининг ривожланиш суръатларига қизиқиш билдирди.
Ўзбекистон Республикаси
Энергетика вазирлиги Матбуот хизмати
1045
