Энергетика вазирлиги штаби томонидан 2021 йил 29 сентябрь куни Навоий вилоятида ўтказилган тадбир давомида Кармана тумани, “Боғи-шамол” МФЙ ҳудудида фаолият юритаётган “Эргашобод баракаси” МЧЖга қарашли оҳак ишлаб чиқариш цехининг табиий газдан фойдаланиши назорат қилинганида газлаштириш лойиҳа ҳужжатида кўрсатилмаган 1 дона хумдонда 49 дона ностандарт (қўлбола) газ ёндиргичлар ёрдамида оҳак ишлаб чиқараётганлиги маълум бўлди.
Ушбу ноқонуний ҳолат бўйича дастлабки ҳисобланган қўшимча газ ҳажми 98,784 минг метр кубни ва етказилган зарар миқдори 98,784 млн сўмни ташкил этган.
Таққослаш учун ушбу ҳажмдаги табиий газ 9 800 та хонадоннинг бир кунлик истеъмолини ташкил қилади.
Шунингдек, 2021 йил 12 октябрь куни Жиззах вилоятида ҳамкорликда ўтказилган тадбирлар давомида Жиззах шаҳри, “Саноат А” ҳудудида фаолият юритаётган “ZOMIN IDEAL STONE” МЧЖга қарашли оҳак ишлаб чиқариш цехининг табиий газдан фойдаланиши назорат қилинганида ушбу истемолчи 2021 йил 16 сентябрда табиий газдан фойдаланиш қоидаларини бузганлиги учун далолатнома тузилиб газ тармоғидан узилган. Аммо шунга қарамай, ушбу тадбиркор ўзбошимчалик билан газ тармоғига ноқонуний равишда қайта уланиб, 2 дона айланма оҳак печи ёрдамида оҳак ишлаб чиқараётганлиги маълум бўлди.
Ушбу ноқонуний ҳолат бўйича дастлабки ҳисобланган қўшимча газ ҳажми 267,070 минг куб метрни ва етказилган зарар миқдори 267,070 млн сўмни ташкил этган.
Таққослаш учун ушбу ҳажмдаги табиий газ 26 мингта хонадоннинг бир кунлик истеъмолини ташкил қилади.
Мазкур ноқонуний ҳолатлар бўйича расмийлаштирилган ҳужжатлар ҳуқуқни муҳофаза қилувчи органларга топшириш учун тайёрланмоқда.
Ўзбекистон Республикаси
Энергетика вазирлиги Матбуот хизмати
868
