Жорий йилнинг 4 ноябрь куни Ўзбекистон Энергетика вазирлиги ва Финляндиянинг “Wartsila” компанияси ҳамкорлигида электр энергетика соҳаси учун замонавий технологиялар бўйича семинар бўлиб ўтди.
Хусусан, Тошкент, Бухоро, Сирдарё ва Хоразм вилоятларида газ-поршенли ва комбинацияланган иссиқлик электр станцияларини (ИЭС) қуриш лойиҳаларида “Wartsila” компанияси томонидан ишлаб чиқарилган юқори технологияли ускуналарни ўрнатиш кўзда тутилган.
Семинар давомида мазкур компаниянинг энергетика бизнеси бўйича директори Пекка Толонен бошчилигидаги делегация аъзолари бўлажак ИЭСларнинг диспетчерлари ва техник ходимларини ушбу ускунанинг ноёб имкониятлари билан таништирди.
Семинарда таъкидланганидек, 2030 йилга бориб Ўзбекистоннинг электр энергиясига бўлган эҳтиёжи қарийб икки баробарга ортади. Шу муносабат билан мамлакат раҳбарияти томонидан ишлаб чиқариш қувватларини 30 ГВтга ошириш вазифаси қўйилди. Шу билан бирга, 2030 йилга қадар қайта тикланувчи энергия манбаларининг улуши ишлаб чиқарилаётган электр энергияси умумий ҳажмининг 25 фоизигани ташкил қилиши режалаштирилган.
Шунингдек, муқобил энергия қувватларини ривожлантириш, энергия хавфсизлиги, жумладан замонавий технологияларга асосланган иссиқлик электр станцияларини ривожлантириш орқали электр тармоқларининг мувозанатини таъминлашда жуда муҳим бўлиб ҳисобланади.
Шу мақсадда, хусусан, туркиялик инвесторлар билан ҳамкорликда бир қатор замонавий иссиқлик электр станциялари қурилмоқда. Мазкур лойиҳалар доирасида мутахассислар орасида ишончлилиги билан танилган 80 дан ортиқ “Wartsila” машиналарини ўрнатиш режалаштирилган.
Ўзбекистон Республикаси
Энергетика вазирлиги Матбуот хизмати
753
