902 та хонадондаги қўлбола газ жиҳозларида қўшимча 2 100 та хонадонга етарли миқдордаги табиий газ ҳажми самарасиз ёқиб юборилган.
Энергетика вазирлиги ишчи гуруҳи томонидан Қорақалпоғистон Республикаси Нукус тумани “Шўртанбой” овул фуқаролар йиғинининг 2020 йилда табиий газга ўтказилган истеъмолчиларини энергия ресурслари билан таъминлаш ҳолати ўрганилди.
Аниқланишича, аксарият хонадонларда ёнғин ва техник хавфсизлиги қоидаларига зид равишда ностандарт, қўлбола иситиш қозонлари дудбўронсиз ўрнатилган бўлиб, иситиш самарадорлиги ўта паст даражада.
Маълумот учун, овулда жами 1 274 та иситиш мосламалари мавжуд бўлиб, шундан 902 таси ностандарт бўлиб чиқди.
Ўрганиш давомида қишлоқдаги 3 хонадоннинг энергия самарадорлиги тахлил қилинди.
Бунда, хонадонларнинг стандарт, ностандарт газ ускуналари ҳамда кўмирдан фойдаланишдаги ҳаражатлари таҳлил қилинди.
1. Стандарт иситиш қозони ўрнатган хонадонлар куз-қиш мавсумида ўртача 1 800 куб метр (640 минг сўм) табиий газ сарф этган;
2. Кўмир ишлатадиган уйлар ўртача 870 кг кўмирни (264 минг сўм) истеъмол қилган;
3. Ностандарт иситиш қозони ўрнатган уй-жойлар шу даврда ўртача ҳисобда 6 минг куб метр табиий газдан (2,3 миллион сўм) фойдаланган.
Кўриниб турибдики, ностандарт иситиш газ жиҳозидан фойдаланаётган битта хонадон мавсум давомида 4 200 куб метр табиий газдан нооқилона ва самарасиз фойдаланиб қарийб 1 млн 600 минг сўм ортиқча харажат қилмоқда.
Умуман олганда, 2020-2021 йиллар куз-қиш мавсумида ностандарт газ жиҳозлари ўрнатилган 902 та хонадонда 3,8 миллион куб метр табиий газдан самарасиз фойдаланилган бўлиб, 1 миллиард 444 миллион ортиқча сарф этилган. Ушбу ҳажмдаги газ куз-қиш даврида қўшимча 2 100 та хонадонни табиий газ билан таъминлашга етади.
Самарасиз фойдаланилган ушбу ҳажмдаги табиий газ қиймати бугунги кундаги жаҳон бозорида 1 млн 965 минг долларни (1 000 м3 - 517 доллар) ташкил этади.
Шу ўринда, Ишчи гуруҳи томонидан “Шўртанбай” овулининг 902 та хонадонларидаги ностандарт иситиш қозонлари ва печлар ўрнига энергия тежамкор, стандарт ва хавфсизлик қоидаларига жавоб берадиган қозонларга алмаштиришнинг афзаллиги ҳамда кўмир ёқилғисидан фойдаланилганида юзага келадиган иқтисодий манфаатдорлик бўйича тегишли тавсиялар берилди.
Бу саъй-ҳаракатлар, аввало, мамлакат иқтисодиётини юксалтириш, шунингдек, ҳар бир оиланинг табиий газ учун харажатини 3 баробаргача тежашга қаратилган.
Ўзбекистон Республикаси
Энергетика вазирлиги Матбуот хизмати
768
