Ҳурматли истеъмолчилар!
Ўзбекистон Республикаси Энергетика вазирлиги ўзининг очиқлик сиёсатидан келиб чиқиб, энергетика соҳасига оид ҳар қандай воқеа ва ҳодисалар ҳамда уларнинг келиб чиқиш сабаблари тўғрисида аҳолини ўз вақтида хабардор қилиб боришга ҳаракат қилади. Шу мақсадда Энергетика вазирлиги фаолиятига оид барча маълумотлар вазирликнинг расмий веб-сайти ва ижтимоий тармоқлардаги саҳифаларида жойлаштирилиб оммавий ахборот воситаларида кенг ёритиб борилмоқда.
Шунингдек, вазирлик томонидан аҳолининг фикр-мулоҳазаларини янада чуқурроқ ўрганиш, юзага келаётган муаммоларни ўз вақтида бартараф этиш мақсадида вазирлик ваколатига кирувчи аҳолини ўйлантираётган масалалар юзасидан тушунтиришлар бериб бориш мақсадида ижтимоий тармоқлар доимий равишда таҳлил қилиб борилмоқда.
Хусусан, ушбу мурожаат сўнгги кунларда ижтимоий тармоқларда муҳокама қилинаётган масалага ойдинлик киритишга бағишланади. Яъни, ҳозирги кунда электр энергияси таъминотида қисқа муддатли узилиш ҳолатлари кузатилаётган бўлсада, бироқ сўнгги йилларда электр энергияси таъминоти сезиларли даражада яхшиланганини ҳам қайд этиш жоиз.
Ҳақиқатан ҳам электр таъминотида қисқа муддатли узилишлар ҳали ҳам учраб турибди. Бироқ кўп ҳолларда, бу 10 дақиқадан 2 соатгача бўлган қисқа муддатли узилишларни ташкил қилади.
Бироқ, шу ҳам эсда тутиш керакки, яқин ўтмишда барчамиз “оммавий ўчириш” ҳолатига дуч келар эдик. Аслида, бу энергия сарфини тежаш учун маълум бир жадвалга мувофиқ амалга оширилган узилишлар эди. Фақатгина 5 йил олдин тугатилган “оммавий ўчиришлар”нинг сабаби эса оддий. Йиллар давомида электр энергияси истеъмоли ўсишига қарамай, бир хил энергия баланси шаклланган ва мавжуд балансни тенг тақсимлаш мақсадида деярли ҳар куни 6 ёки ундан кўпроқ соатга электр энергия таъминотида узилишлар рўй берган. Масалан, ўша йилларда Қашқадарё вилоятида ана шундай режали ўчиришлар кунига 18 соатгача етган. Аҳолининг сўзларига кўра, ўша вақтларда эрталаб ва кечқурун фақат 2-3 соат электр энергияси берилган холос.
Шунга қарамай, 25 йил давомида маълумотларга кўра, мамлакатда электр энергияси истеъмоли бор йўғи 20 фоизга ўсган. Сўнгги 5 йил ичида электр энергияси истеъмолининг ўсиши ЙИЛЛИК 11 фоизни ташкил қилади.
Шуни алоҳида қайд этиш керакки, сўнгги 5 йил давомида энергия баланси аҳолининг реал эҳтиёжларидан келиб чиққан ҳолда шакллантирилди.
Натижада, биз кунлик узоқ муддатли ўчиришларга барҳам бердик, маълум сабабларга кўра юзага келаётган қисқа муддатли электр таъминотидаги узилишлар эса туну-кун ишлайдиган аварияга қарши махсус бригадалар томонидан зудлик билан бартараф этиб борилмоқда.
Бу каби узилишларнинг бир неча йил аввал Самарқанд, Бухоро, Урганч ва республикамизнинг бошқа ҳудудларида деярли ҳар куни 4-6 соат давомида электр таъминотисиз қолган ўтмиши билан алоқаси йўқ! Мамлакатимиз энергетика соҳасида сўнгги йилларда амалга оширилаётган ислоҳотлар, истиқболли лойиҳалар электр энергиясини ишлаб чиқариш ҳажми нафақат анъанавий иссиқлик электр станциялари ҳисобидан балки қуёш ва шамол электр станциялари орқали ҳам ошириб борилмоқда.
Маълумот учун:
- 1991-2016 йилларда ёки 25 йил ичида республика бўйича 9 300 км электр узатиш тармоқлари ва 4 800 та трансформаторлар янгиланган.
- 2017-2021 йиллар давомида (охирги беш йилда) 40 600 км бўлган электр узатиш тармоқлари ва 12 900 та трансформаторлар янгиланмоқда. 4 600 МВтдан зиёд янги қувватлар ишга туширилмоқда.
Ўзбекистон Республикаси
Энергетика вазирлиги Матбуот хизмати
1172
