Бугун мамлакатимиз аҳолиси, ижтимоий соҳа объектлари ва иқтисодиёт тармоқларини 2021-2022 йиллар куз-қиш мавсумига барқарор электр энергияси билан таъминлаш мақсадида Энергетика вазирлиги ва “Иссиқлик электр станциялари” АЖ томонидан амалга оширилган ишлар билан таништириб ўтамиз.
Аввало шуни қайд этмоқчи эдикки, 2021 йилнинг ўтган 10 ойи якунига кўра “Иссиқлик электр станциялари” АЖ таркибидаги иссиқлик электр станциялари ва марказлари томонидан электр энергияси ишлаб чиқариш режаси ортиғи билан бажарилди. Режа бўйича 45,8 млрд кВт.соат ўрнига, амалда 48,9 млрд кВт.соат электр энергияси ишлаб чиқарилди. Бу режага нисбатан 106,2 фоиз ва 2020 йилнинг мос даврига нисбатан 112,2 фоизни ташкил қилмоқда.
2021-2022 йиллар куз-қиш мавсумини ишончли ўтказиш учун, электр энергияси истеъмолини ҳисобга олган ҳолда, 2021 йил октябрдан 2022 йил апрелгача 31,7 млрд кВт.соат электр энергиясини ишлаб чиқариш режалаштирилган бу кунлик ўртача 200 млн кВт.соатни ташкил этади.
Куз-қиш мавсумида энергоқурилмаларни барқарор ишлашини таъминлаш мақсадида қуйидаги ташкилий ишлар бажарилди:
2021-2022 йиллар куз-қиш мавсумига иссиқлик электр станцияларни тайёрлаш мақсадида 7 та энергоблок, 13 та қозон, 2 та турбоагрегат ва 7 та буғ-газ қурилмаси ва 1 та газ-турбина қурилмаларнинг мукаммал, ўрта ва жорий таъмирлаш ишларини бажариш белгиланган эди ва барча таъмирлаш ишлари тўлиқ бажарилди.
Таъмир ишларини бажариш учун 2021 йилда 700,8 млрд сўм маблағ сарфланди. Бу ўтган йилга нисбатан 220 фоизга кўп бўлиб, жорий йилда мамлакатимиз раҳбариятининг соҳани ривожлантиришга бўлган катта эътиборини кўрсатмоқда.
Иссиқлик электр станциялари ва марказлари кесимида режалаштирилган таъмир ишлари (иш ҳажми)ни тўлиқ амалга оширилгандан сўнг, энерго қурилмаларнинг мавжуд қуввати 282 МВтга оширилишига эришилди.
Бундан ташқари:
- Навоий, Тўрақўрғон, Толимаржон, Тахиатош, Тошкент иссиқлик электр станцияларидаги буғ-газ қурилмалари созламалари ташқи электр узатиш тизимларининг салбий таъсирини олдини олиш мақсадида Миллий диспетчерлик маркази билан ҳамкорликда белгиланган меъёрлар талабига келтирилди;
- “УзАссистем” МЧЖ билан биргаликда Тахиатош ИЭС янги қурилган буғ-газ қурилмалари генераторлар созламалари тизим талаблари доирасига келтирилди;
- ёқилғи сифатини ошириш мақсадида Тўрақўрғон, Навоий ва Толимаржон иссиқлик электр станцияларида қўшимча газ тозаловчи фильтр-сепараторлар ўрнатилди;
- барча тизим корхоналари чиқувчи юқори кучланишли электр линиялари ҳимоя тизимлари қайта кўриб чиқилди;
- куз-қиш мавсумига тайёргарлик кўриш мақсадида ёқилғи-мойлаш, турбина ва трансформатор мойлари ҳамда кимёвий реагентлар, эҳтиёт қисмлар заҳираси яратилди;
- Мавсум давомида авария ўчишларини олдини олиш ҳамда уларни тезкорлик билан бартараф этиш, ишлаб чиқариш қувватлари барқарорлигини таъминлаш мақсадида суткасига 24 соат фаолият юритувчи ишчи-штаб ва диспетчерлик мониторинг маркази ташкил этилди;
- Тизим корхоналарида масъул ходимлардан иборат, тун-у кун фаолият юритувчи қўшимча навбатчилик гуруҳлари ташкил этилди.
Энергетика вазирлиги Матбуот-штаби ва
“Иссиқлик электр станциялари” АЖ Матбуот хизмати
695
