“InnoWeek.Uz-2021” халқаро инновацион ғоялар ҳафталиги доирасида илмий-инновацион изланишларни ишлаб чиқариш жараёнига кенг жалб этиш бўйича “Иссиқлик электр станциялари” АЖ ва И.Каримов номидаги Тошкент давлат техника университети ўртасида ҳамкорлик меморандуми имзоланди.
Мазкур меморандум доирасида Тошкент давлат техника университетида 2022-2026 йиллар давомида “Иссиқлик электр станциялари” АЖ тизим корхоналари учун замонавий билимларга эга малакали кадрлар тайёрлаш ҳамда кадрлар малакасини ошириш лойиҳаларини амалга ошириш режалаштирилган. Шунингдек, ишлаб чиқариш жараёнини замонавий-инновацион ечимлар асосида ривожлантириш ишлари олиб борилади.
Айни дамда “Иссиқлик электр станциялари” АЖ томонидан ТДТУ билан ҳамкорликда қуйидаги лойиҳалар амалга оширилмоқда:
- “Электр таъминоти” кафедраси олимлари билан “Тошкент ИЭС” АЖда “Циркуляция насоси юритмаси электр двигателини такомиллаштириш орқали электр энергиясини иқтисод қилиш” лойиҳаси ва “Иссиқлик энергетикаси ва АЭС” кафедраси олимлари билан “Энергоблоклардаги регенератив ҳаво қиздиргич қурилмаларининг энергетик самарадорлигини ошириш” ҳамда “Рекуператив иссиқлик алмашиниш қурилмаларининг самарадорлигини локал турбулизатор ёрдамида жадаллаштириш” лойиҳалари бўйича ишлар олиб борилмоқда;
- “Навоий ИЭС” АЖда “Энергоблокларининг қозон агрегатлари механизмлари ва катта қувватли насос агрегатлари юритмаларидаги двигателларни бир фазали ерга қисқа туташиш токидан ҳимоя қилиш ва шикастланишларнинг олдини олиш технологиялари” лойиҳаси устида ишланмоқди;
- “Сирдарё ИЭС” АЖда “Насос агрегатлари юритмаларига частота ўзгартиргич қурилмасини ўрнатиш” лойиҳаси амалга оширилди. Лойиҳани амалга ошириш натижасида электр энергиясининг ўз эхтиёжларига сарфини сезиларли камайтиришга эришилди.
- “Тўрақўрғон ИЭС” УКда “Буғ-газ қурилмаларида ҳавони тозалаш ва совутиш ҳисобига самарадорликни ошириш” лойиҳаси устида ишлар олиб борилмоқда.
Жорий йилнинг 22-27 ноябрь кунлари бўлиб ўтиши режалаштирилган “InnoWeek.Uz-2021” халқаро инновацион ғоялар ҳафталигида “Иссиқлик электр станциялари” АЖ электр станцияларни ривожлантириш соҳасида илмий-амалий ҳамкорликни ривожлантириш, энергосамарадор технологияларни жорий этиш бўйича маҳаллий илмий ҳамжамиятлар билан изланишлар олиб бориш борасида лойиҳалари билан иштирок этмоқда.
“Иссиқлик электр станциялари” АЖ Матбуот хизмати
992
