Айни кунларда “Ўзтрансгаз” АЖ томонидан республика бўйлаб магистрал газ қувурларини қуриш, таъмирлаш ва реконструкция қилиш ишлари кенг кўламда амалга ошириляпти.
“2021-2022 йилларда Республика магистрал газ узатиш тизимини модернизация қилиш ва самарадорлигини ошириш дастури”га мувофиқ, 315 км магистрал газ қувури қурилмоқда. Жумладан, “Газли-Когон” магистрал газ қувури бўйлаб янги, узунлиги 140 км, “Янгиер-Оҳангарон” газ қувурида 95 км.га тенг, Ўрта Осиёни Марказ билан боғлайдиган “САЦ 2” бўйлаб 80 км қувурларини қуриш режалаштирилган. Шунингдек, дастур доирасида 196 км узунликдаги магистрал газ қувурлари реконструкция қилинади ҳамда капитал таъмирланади.
Ҳозирда кенг кўламли қурилиш ишлари олиб борилаётган майдонлардан бири бу - Газли-Когон магистрал газ қувури! У орқали узатилаётган табиий газ республика истеъмолчиларининг салмоқли қисмини ташкил этадиган марказий ва шарқий ҳудудлар Жиззах, Сирдарё, Тошкент, Фарғона водийсига етказиб берилади.
Газли-Когон йўналишида ҳозирда 3 та тармоқ бўлиб, унинг биринчи ва иккинчиси 1973-1983 йилларда, 3-тармоғи 2006 йилда ишга туширилган. Тармоқлардан суткасига 35 млн метр кубгача табиий газ ўтказилади. Иқтисодиёт тармоқларининг кенгайиши, саноат объектлари, янги турар жой биноларнинг қурилиши зангори ёқилғига талабнинг ортишига сабаб бўлмоқда. Шу мақсадда айни кунларда Газли-Когон магистрал газ қувурининг янги, 4-тармоғи - узунлиги 140 км га тенг газ қувури бунёд этилмоқда.
Ҳозирда объектда 200 га яқин ишчи-ходим меҳнат қилмоқда, 80 га яқин махсус техника жалб қилинган. Бугунги кунга қадар 100 км.га яқин масофада қурилиш-монтаж ишлари бажарилди.
Янги қурилган магистрал газ қувури ишга туширилиши ҳисобига газ ўтказучанлик ортиб, суткасига қўшимча 25 млн. куб метр табиий газни Республиканинг шимолий қисмидан жанубий қисмига ўтказиш имкони яратилади.
Кенг кўламли қурилиш ишларидан ташқари ҳозирда Газли-Когон магистрал газ қувурининг биринчи тармоғида реконструкция ишлари амалга оширилмоқда. Яқин йилларда мазкур газ қувурининг 27 км қисми янгиланади.
Энергетика вазирлиги Матбуот-штаби
ва “Ўзтрансгаз” АЖ Матбуот хизмати
777
