Бугун тунги соат 00:00 да Энергетика вазирлиги, “Иссиқлик электр станциялари” акциядорлик жамияти ҳамда Миллий диспетчерлик маркази билан келишилган ҳолда, Тўрақўрғон иссиқлик электр станцияси 2-энергоблок Ҳавони комплекс тозалаш ускунасида (КВОУ) 1- ва 2-поғона ҳаво фильтрларини (ҳар бирида 624 та) янгилаш ва тозалаш ишлари бошланди.
Ушбу муҳим тадбирга станциянинг барча цехлари ва бўлимларидан малакали мутахассислар жалб қилиниб, ишлар тасдиқланган аниқ схема-режа асосида тун-у кун давомида ҳар бири 32 нафар мутахассисдан иборат иккита сменада ташкил қилинди. “Иссиқлик электр станциялари” акциядорлик жамияти масъул ходимлари раҳбарлигида бошланган ишларга, шунингдек «Шарқтехэнерготаъмир» корхонасининг бир гуруҳ ходимлари ҳам жалб қилинди.
Тадбирга пухта тайёргарлик кўрилганлиги, махсус техникалар иши тўғри ташкил этилганлиги, шунингдек барча ходимлар томонидан ушбу муҳим ишга катта масъулият ва шижоат билан ёндошилганлиги натижасида 2-энергоблокнинг 2-поғона фильтрлари қисқа вақт ичида тўлиқ тозаланди, 1-поғона ҳаво фильтрларини янгиларига алмаштириш ишлари ҳам эрталаб соат 9:00 га қадар тўлиқ якунланди.
Бу ишлардан ташқари, тадбир давомида трансформаторлар изоляторлари мутахассислар томонидан тозалаб чиқилди, шунингдек махсус жалб қилинган “Ўзбекэнергосозлаш” корхонаси мутахассислари томонидан 2-қозон утилизатори паст босимли сув экономайзери трубаларининг ҳолати, яъни коллекторда зарарли қолдиқлар ва ёриқларнинг мавжудлигини аниқлаш мақсадида профилактик текширув ўтказилди ҳамда унинг натижасига асосан тегишли техник хулоса тайёрланади.
- Шуни таъкидлаш лозимки, юқори малакали мутахассислар назоратида амалга оширилган ишлар давомида, энг аввало, инсон манфаатлари ва қадрини юқори қўйган ҳолда хавфсизлик техникасига қатьий риоя қилинишига алоҳида эътибор қаратилдики, бу эса ўз навбатида бажарилган ишларнинг сифатли ҳамда беталофот амалга оширилишига имкон яратди-дейди электростанция бош директори И.Басидов.
Станциянинг қиш кунларида ишончли ишлашини таъминлашга қаратилган тезкор чора-тадбирла якунлангач, бугун 4 декабрь куни соат 14-00 дан бошлаб станциянинг иккинчи энергоблоки қайта ишга туширилди ҳамда айни пайтда станция тўлиқ штат режимида электр энергияси ишлаб чиқармоқда.
Энергетика вазирлиги Матбуот хизмати ва
“Иссиқлик электр станциялари” АЖ Матбуот хизмати
726
