Конституциямизда фуқароларнинг ҳуқуқ ва эркинликлари кафолатланиши билан бирга бурч ва мажбуриятлари ҳам белгилаб қўйилган. Шундай экан, ҳар бир истеъмолчи электр эгенргиясидан тўғри ва қонуний тартибда фойдаланиши, белгиланган тўловларни ўз вақтида амалга ошириб, ноқонуний ҳатти-ҳаракат содир этмасликлари зарур.
Бироқ, айрим истеъмолчилар томонидан электр энергиясига ноқонуний уланиб олиш ва фойдаланиш ҳолатлари учраб турибди.
Рақамларга мурожаат қиладиган бўлсак, жорий йил бошидан вилоят бўйича аҳоли истеъмолчилари томонидан 1268 та ҳолатда электр энергиясидан ноқонуний фойдаланиш ҳолатлари аниқланган бўлиб, ушбу ноқонуний ҳолатлар юзасидан умумий 921,3 млн сўм қайта ҳисоб-китоб ишлари амалга оширилган.
Бундан ташқари, улгуржи истеъмолчилар томонидан 772 та ҳолатда электр энергиясидан ноқонуний фойдаланиш ҳолатлари аниқланиб, умумий ҳисобда 5 млрд 850 млн сўмга қайта ҳисоб-китоб ишлари амалга оширилган.
“Фарғона ҳудудий электр тармоқлари корхонаси” АЖ томонидан жойларда мунтазам электр энергиясидан ноқонуний фойдаланиш ҳолатларини олдини олишга қаратилган рейд тадбирлари ўтказиб келинмоқда.
Бундан асосий мақсад - электр энергиясидан ноқонуний фойдаланиш ҳолатларига бутунлай барҳам бериш ва истеъмолчиларни сифатли ва барқарор электр энергияси билан таъминлашдан иборатдир.
Ўтказилаётган тадбирлар давомида жойларда аниқланган қоидабузарлик ҳолатлари юзасидан тегишли тартибда далолатномалар расмийлаштирилиб, вақтинча электр тармоғидан ажратилмоқда.
Жойларда электр энергиясидан ноқонуний фойдаланиш ҳолатларининг олдини олишга қаратилган рейд тадбирлари давом этмоқда.
Шу ўринда, электр энергияси истеъмолчиларидан бугунги кунда электр энергиясидан қонуний, оқилона ва самарали фойдаланишларини сўраб қоламиз.
“Фарғона ҲEТК” АЖ Матбуот хизмати.
980
