Хабарингиз бор, жорий йилнинг 22 октябрь куни Ўзбекистон Республикаси Президенти Шавкат Мирзиёев томонидан саноатни ривожлантириш, нефть-газ маҳсулотлари ишлаб чиқариш ва истеъмолчиларга мунтазам етказиб бериш борасидаги ишлар таҳлилига бағишланган йиғилиш бўлиб ўтган эди.
Ушбу йиғилишда давлатимиз раҳбари томонидан углеводород хомашёсини қазиб олиш ва қайта ишлаш ҳажмини ошириш, иқтисодиёт тармоқлари, аҳоли ва экспортга ёқилғини узлуксиз етказиб бериш, технологик сарф-харажат ва йўқотишларни камайтиришга алоҳида эътибор қаратиш зарурлиги таъкидланиб, зарурий топшириқлар берилган эди.
2019 йил 28 октябрь куни Қарши шаҳридаги “Ўзбекнефтгаз”АЖ биносида ушбу топшириқларни жойлардаги ижросини таъминлаш мақсадида Ўзбекистон Республикаси Бош вазирининг маслаҳатчиси, Энергетика вазири Алишер Султонов томонидан йиғилиш бўлиб ўтди.
Тизим раҳбарлари иштирокидаги йиғилишда нефть маҳсулотлари, табиий ва суюлтирилган газ ишлаб чиқариш ҳамда уларни иқтисодиёт тармоқлари ва аҳолига етказиб бериш прогноз кўрсаткичларининг бажарилиш ҳолати таҳлил этилди.
Йиғилиш якунига кўра, муҳокама қилинган масалалар юзасидан тегишли чора-тадбирлар белгиланди.
Унга кўра, режада белгиланган вазифаларни ижросини ўз вақтида таъминламагани учун Муборак нефт ва газ қазиб чиқариш бошқармаси бошлиғи Б.Нарзиев эгаллаб турган лавозимидан озод этилди. Ушбу лавозимга Углеводородларни қазиб чиқариш департаменти бошлиғи Р.Шеров тайинланди.
“Ўзбекнефтгаз” АЖ бошқарув раисининг қазиб чиқариш бўйича ўринбосари Алишер Мустафаев ҳамда Устюрт газ қазиб чиқариш бошқармаси бошлиғи О.Оринбаев ишдаги камчиликлари сабаб қатъий огоҳлантириш олди.
«Ўзбекнефтгаз» АЖ Газли нефт ва газ қазиб чиқариш бошқармаси бошлиғи К.Амоновга ушбу лавозимга яқинда тайинланганлиги сабаб йил якунига қадар қазиб чиқариш кўрсаткичларини янада ошириш талаби қўйилди.
“Ўзбекнефтгаз” АЖ Матбуот хизмати
1762
