“Иссиқлик электр станциялари” АЖ таркибидаги корхоналарда аҳоли, ижтимоий соҳа объектлари ва иқтисодиёт тармоқларини сифатли электр энергияси билан таъминлаш мақсадида туну кун, суткасига 24 соат – узлуксиз иш фаолияти ташкил этилган.
Марказий Осиёдаги энг йирик электр станциялардан бири “Навоий ИЭС” АЖ Навоий, Бухоро, Қашқадарё ва Самарқанд вилоятларини электр ҳамда иссиқлик энергияси билан таъминловчи йирик энергообъект ҳисобланади.
Станцияда 6 та энергоблок, 478 ва 450 МВт қувватга эга 2 та замонавий буғ-газ қурилмалари тўхтовсиз равишда туну кун ишламоқда.
Байрам кунларида халқимизга сифатли ва узлуксиз электр ҳамда иссиқлик энергияси етказиб бериш мақсадида, станция ходимлари касб вазифаларини адо этган ҳолда янги йилни ишхонада кутиб олишмоқда.
“Навоий ИЭС” АЖнинг республикадаги ўрни беқиёс. Унинг ўрнатилган ишлаб чиқариш қуввати 2018 МВт, иссиқлик энергияси етказиб бериш қуввати 1650 Гкал/соатни ташкил этади.
Бугунги кунда станцияда жаҳон талабларига жавоб бера оладиган замонавий ҳамда энерготежамкор буғ-газ қурилмаларини ишга тушириш лойиҳалари ишлаб чиқилмоқда.
Шунингдек, ёш кадрларнинг мукаммал илм олишига алоҳида эътибор қаратилиб, станция томонидан чет тилларини ўрганишга ҳам кенг имкониятлар эшигини очиб бермоқда.
Ўзбекистон Республикаси Энергетика вазирлиги Матбуот хизмати
ва “Иссиқлик электр станциялари” АЖ Матбуот хизмати ҳамкорликда.
570
