Ўзбекистондаги энг йирик энергетика корхоналаридан бири бўлган “Сирдарё ИЭС” АЖда “Рақамли Ўзбекистон-2030” стратегияси доирасида электр станцияда 2020-2022 йилларда рақамли трансформация дастури амалга оширилмоқда.
Бу ерда Президентимизнинг 2017 йил 29 декабрдаги “Сирдарё иссиқлик электр станциясида энергоблокларни босқичма-босқич модернизация қилиш чора-тадбирлари тўғрисида”ги фармойишига мувофиқ Россиянинг “Силовые машины” компанияси томонидан 2019-2021 йилларда 6 та энергоблок (3, 4, 5, 6, 9, 10-энергоблоклар) тўлиқ модернизация қилиниб, бошқариш жараёнлари тўлиқ рақамлаштирилди.
- Натижада, замонавий технологиялар жорий этилган ҳар бир энергоблокнинг қуввати 325 МВт га етказилди, 1 кВт соат учун шартли ёқилғи сарфи 40 граммга камайди, натижада уч босқичли модернизация ишлари якунида йилига 270 миллион кубометр табиий газ тежашга эришилмоқда, - дейди электр станция бош директори Баҳодир Нурдинов.
Авваллари синов тариқасида биринчи ва иккинчи блок рақамлаштирилган эди, ҳозирда еттинчи ва саккизинчи энергоблокларни бошқариш жараёнларини ҳам рақамлаштириш имкониятлари кўриб чиқилмоқда.
Рақамлаштириш дастурига асосан станциянинг Ахборот технологиялари ва рақамлаштириш бўлими мутахассислари томонидан 1 С 8.3 платформасида ишлаб чиқариш жараёнида нуқсонларни қайд этиш журнали ва норматив ҳужжатларнинг электрон базаси яратилди.
Ахборот технологиялари ва рақамлаштириш бўлими бошлиғи Наимжон Ҳасановнинг маълум қилишича, ушбу тизим қурилма ва ускуналарда иш жараёнида юзага келадиган нуқсонларни ўз вақтида қайд этиш ва уларни бартараф этиш имконини беради. Бундан ташқари, таҳлил ва мониторинг қилиш, шунингдек келгусида ускуналарда нуқсонлар келиб чиқишининг олдини олиш бўйича самарали дастурий маҳсулот ҳисобланади.
Корхонанинг 20 та енгил ва юк автотранспортларига GPS ускуналари ўрнатилди, бундан кўзланган асосий мақсад транспорт воситаларидан унумли харажатларни оптималлаштирган ҳолда фойдаланишдан иборат.
Ўзбекистон Республикаси Президентининг 2020 йил 24 февралда ПҚ-4611-сонли “Молиявий ҳисоботнинг халқаро стандартларига ўтиш бўйича қўшимча чора-тадбирлар тўғрисида”ги қарорига асосан электр станцияда Молиявий ҳисоботнинг халқаро стандартларига ўтиш бўйича тизимли ишлар ҳам амалга оширилмоқда.
“Иссиқлик электр станциялари” акциядорлик жамияти томонидан ACCA GOLD статусига эга “IBS Tashkent” маркази билан ҳамкорликда корхонада фаолият олиб бораётган бухгалтер-кадрлар малакасини ошириш ва молиявий ҳисоботларнинг халқаро стандартлари (МҲХС)га ўтиш жараёнини такомиллаштириш мақсадида ўқув-курслари ташкил этилди.
Шунингдек, 1С 8.3 марказлаштирилган ҳамда автоматлаштирилган дастурий таъминот асосида солиқ қўмитасининг “E-ombor” тизими билан интеграция қилиш мақсадида, корхона марказий омборига оптик тола кабеллари ташлаш ва корхона локал ҳисоблаш тармоғига улаш ишлари олиб борилмоқда.
“Иссиқлик электр станциялари” АЖ Матбуот хизмати
714
