Жорий йилнинг 30 октябрь куни Энергетика вазирлигида Ўзбекистон Республикаси Энергетика вазири Алишер Султоновнинг ШҲТ Бош котиби Владимир Норов билан учрашуви бўлиб ўтди.
Мулоқот чоғида таъкидланганидек, Шанхай Ҳамкорлик Ташкилоти ўз фаолияти давомида Марказий Осиёда иқтисодий ҳамкорликни ривожлантириш, барқарорлик ва хавфсизликни мустаҳкамлаш бўйича кўплаб ишлар қилди.
Бугунги кунда ШҲТга аъзо давлатлар ўртасида иқтисодиётнинг барча соҳаларида ҳамкорлик йўлга қўйилган, илмий-тадқиқот институтлари ўртасидаги ҳамкорлик алоқалари ривожланмоқда, умумий бозорлар, шу жумладан, энергия манбаларини яратиш масалалари кўриб чиқилмоқда.
Томонлар ШҲТга аъзо мамлакатлар, жумладан, ХХР билан кўп томонлама савдо-иқтисодий ҳамкорликнинг истиқболли йўналишларини муҳокама қилдилар. Улар қаторида кўмир ва табиий газни чуқур қайта ишлаш учун инновацион технологияларни жорий этиш бўйича лойиҳаларни амалга ошириш бўйича мулоқотларни ривожлантириш масалалари хусусида сўз юритилди.
Қайд этиш керак, ШҲТга аъзо давлатларда энергия самарадорлигини ошириш соҳасида, жумладан, тоза энергия технологиялари бўйича тажриба алмашиш ва энг яхши амалиётларга бўлган қизиқиш ва истиқбол мавжуд.
Ўзбекистон Республикаси
Энергетика вазирлиги Матбуот хизмати
959
