Бугун, 2022 йил 9 февраль куни буюк шоир ва мутафаккир Алишер Навоий таваллудининг 581 йиллиги муносабати билан “Адиблар хиёбони”даги шоир ҳайкали пойида адабий-маърифий тадбир ҳамда гул қўйиш маросими бўлиб ўтди.
Тадбир Ўзбекистон Ёзувчилар уюшмаси томонидан ташкил этилиб, унда Ўзбек тили ва адабиёти университети, шоир ва ёзувчилар, санъат арбаблари, талабалар, Энергетика вазирлиги ҳамда қатор давлат ва жамоат ташкилотлари вакиллари иштирок этиди.
Тадбирда таъкидланганидек, Алишер Навоийнинг бебаҳо ижодий-илмий мероси нафақат халқимиз, балки жаҳон адабиёти, миллий маданиятимиз ва адабий-эстетик тафаккуримиз ривожида алоҳида ўрин тутади.
Улуғ шоир ўзининг шеърий ва насрий асарларида юксак умуминсоний ғояларни, она тилимизнинг беқиёс сўз бойлиги ва чексиз ифода имкониятларини бутун жозибаси ва латофати билан намоён этиб, миллионлаб китобхонлар қалбидан муносиб ўрин эгаллаган.
Алишер Навоий қаламига мансуб бой маънавий мерос асрлар оша инсонлар қалбига эзгулик зиёсини таратиб келмоқда.
Президентимиз Шавкат Мирзиёев: “Инсонпарварлик руҳи билан йўғрилган ислоҳотларимиз буюк Алишер Навоий бобомизнинг битта кўнгли ўксик одамни хурсанд қилиш — Каъбани обод этиш билан баробар, деган теран маъноли сўзларига ҳар томонлама уйғун ва ҳамоҳангдир” дея таъкидлаган эдилар.
Шу куни Алишер Навоий номидаги Тошкент Давлат ўзбек тили ва адабиёти университетига туташ ҳудуддаги улуғ мутафаккир бобомиз ҳайкали ҳамда пойтахтимизнинг Алишер Навоий номидаги “Шоирлар хиёбони”да мушоира ҳам бўлиб ўтди.
Ўзбекистон Республикаси
Энергетика вазирлиги Матбуот хизмати
2262
