2022 йил 15 февраль куни Экспо 2020 Бутунжаҳон кўргазмасида (Дубай, БАА) Ўзбекистон энергетика ҳафталиги доирасида “Uzbekistan GTL” вакиллари “Honeywell UOP” (АҚШ) делегацияси билан бизнес-учрашув ўтказди ва унинг якунлари бўйича Ҳамкорлик Меморандуми имзоланди.
Ўзбекистондаги GTL заводи негизида қуввати йилига 100 минг тоннагача бўлган чизиқли алкилбензоллар ишлаб чиқаришнинг қурилиши режалаштирилган. Янги ишлаб чиқариш учун хом ашё сифатида GTL керосин ишлаб чиқариш жараёнида ҳосил бўладиган оралиқ маҳсулотлар хизмат қилади.
Чизиқли алкилбензол суюқ совунлардан бошлаб кир ювиш кукунларигача бўлган барча турдаги ювиш воситаларини ишлаб чиқариш учун асосий хом ашё ҳисобланади. Бугунги кунда ювиш воситалари бозори энг жадал ривожланаётган бозорлардан бири бўлиб, ҳам республикада, ҳам МДҲ мамлакатларида ЧАБга бўлган талаб сезиларли даражада ошганлиги кузатилмоқда.
Имзоланган меморандум “Uzbekistan GTL” ва “ Honeywell UOP ” ўртасида ҳамкорликни кенгайтириш билан бирга янги ишлаб чиқаришни ташкил этиш бўйича техник-иқтисодий, лицензиялаш ва бошқа ҳужжатларни биргаликда ишлаб чиқишни назарда тутади.
Аввалроқ Ўзбекистон Президенти Шавкат Мирзиёев “Uzbekistan GTL” синтетик суюқ ёқилғи ишлаб чиқариш мажмуасининг очилиш маросимида ташкил этилаётган ягона нефт-кимё кластери доирасида завод атрофида янги сателит ишлаб чиқариш қувватларини ташкил этиш бўйича топшириқ берган эди. Очилиш маросимида Ўзбекистон Президентига “Uzbekistan GTL” заводи негизида чизиқли алкилбензоллар ишлаб чиқаришни ташкил этиш бўйича истиқболли лойиҳа тақдим этилди. Мазкур лойиҳанинг амалга оширилиши кир ювиш воситалари учун хомашё ишлаб чиқаришни тўлиқ маҳаллийлаштириш, шунингдек, экспорт қилишни йўлга қўйиш имконини беради.
“Honeywell UOP” нефтни қайта ишлаш, нефт-кимё ва газни қайта ишлаш саноатлари учун қайта ишлаш технологиялари, катализаторлар, адсорбентлар, ускуналар ва консалтинг хизматларини етакчи халқаро етказиб берувчиси ва технологиялар лицензиари ҳисобланади.
975
