“Дубай – EXPO” халқаро кўргазмаси доирасида “Nomac” компанияси ва Ўзбекистон Республикаси Энергетика вазирлиги делегацияси иштирокида учрашув бўлиб ўтди.
“NOMAC” – бу “ACWА Power” компанияси тасарруфидаги иссиқлик, шамол ва қуёш электр станцияларида ишлаб чиқариш жараёнини бошқариш ва мониторинг қилиш бўйича тизим компанияси ҳисобланади.
Компания электр станциялар ва улардаги асосий ҳамда ёрдамчи ускуналардан фойдаланиш, уларнинг техник ҳолатини таҳлил этиш, юз бериши мумкин бўлган фавқулодда ҳолатларни аниқлаш, бунинг воситасида аварияларни олдини олиш ишларини олиб боради.
Юқори даражада рақамлаштирилган ушбу тизим, фавқулодда ҳолатлар ва аварияларни олдини олиши натижасида истеъмолчиларга барқарор электр энергиясини узатиш ҳамда катта миқдордаги харажатларни иқтисод қилиш имкониятини беради.
Ташриф чоғида ушбу юқори самарадор ва замонавий технологияларни Ўзбекистон энерготизимида жорий этиш, уларни юртимизга олиб кириш бўйича музокаралар олиб борилди.
Ўзбекистон Республикаси
Энергетика вазирлиги Матбуот хизмати
1070
