“Дубай – EXPO 2020” халқаро кўргазмаси доирасида “Иссиқлик электр станциялари” АЖ дунёнинг катта тўртлик (big four) компаниялари туркумига кирувчи “KPMG” (АҚШ) аудиторлик компанияси билан истиқболдаги лойиҳалар ижроси бўйича музокаралар ўтказди.
“Иссиқлик электр станциялари” АЖ бошқаруви раиси Фарҳод Абдураҳмонов ва “KPMG” (АҚШ) компаниясининг МДҲ давлатлари бўйича раҳбари Василий Савин “Иссиқлик электр станциялари” акциядорлик жамияти ва унинг тизим корхоналарида харидлар трансформацияси жараёнини жадаллаштириш ва молиявий ҳисоботларнинг халқаро стандартларига ўтишини таъминлаш масалаларини муҳокама қилди.
Ушбу йўналишда амалга оширилаётган ишлардан кўзланган асосий мақсад бу халқаро кредит рейтингларини қўлга киритиш ҳамда Жамиятнинг молиявий жозибадорлигини ошириш воситасида йирик инвестиция лойиҳаларни жорий этиш ҳисобланади.
Таъкидлаш лозимки, айни пайтгача “Иссиқлик электр станциялари” АЖ “KPMG” ҳалқаро аудиторлик компанияси билан ҳамкорликда харидлар тизимини “форензик” таҳлили асосида аудитдан ўтказиш бўйича якуний аудитор хулосасини тақдим этди ва уни самарали амалга ошириш бўйича чора-тадбирлар режаси ишлаб чиқилган.
Бу борада, “KPMG” компанияси билан Жамиятнинг активларини халқаро стандартлар асосида ҳаққоний қийматда баҳолаш ишлари якунига етказилди.
Шунингдек, “KPMG” халқаро компанияси билан қуйидаги йўналишлар бўйича “Иссиқлик электр станциялари” АЖда корпоратив бошқарувни ривожлантириш ҳисобига қисқа ва узоқ муддатли ривожланиш стратегияси ҳамда молиявий моделни ишлаб чиқиш ишлари олиб борилмоқда:
• Стратегик режалаштиришни қўллаб-қувватлаш;
• МҲХСга мувофиқ молиявий ҳисоботларни амалга оширишни қўллаб- қувватлаш;
• Мувофиқлик функциясини кучайтиришни қўллаб -қувватлаш;
• Ахборотни ошкор этилиши тизимини такомиллаштириш;
• Таълим ва баҳолаш жараёнини такомиллаштириш;
• Гендер тенглиги тамойилларини амалга ошириш ва гендер фаолиятининг асосий йўналишлари бўйича батафсил тавсиялар ишлаб чиқиш.
“Иссиқлик электр станциялари” АЖ Матбуот хизмати.
718
