Ўзбекистон Энергетика вазири Алишер Султанов Саудия Арабистонининг “ACWA Power” компанияси бошқаруви раиси Mуҳаммад Абунаян билан музокаралар ўтказди.
Учрашув давомида амалдаги ҳаморликдаги лойиҳаларнинг бориши, шунингдек, муқобил энергетика соҳасида янги лойиҳаларни амалга ошириш имкониятлари муҳокама қилинди.
Хусусан, A.Султанов ишлаб чиқариш лойиҳаларини ўз вақтида ишга туширишни таъминлаш, жумладан, “ACWA Power” компанияси томонидан қурилаётган иссиқлик электр станцияси (ИЭС) ва шамол электр станцияларини ишга тушириш ҳамда келгусида техник хизмат кўрсатиш муҳимлигини таъкидлади.
Лойиҳа доирасида Ўзбекистон томони дунёдаги пандемия чекловлари билан боғлиқ қийин логистика ҳолатга қарамай, қурилиш-монтаж ишларининг режа-жадвалларга мувофиқ олиб борилаётганидан мамнунлигини билдирди.
Таъкидлаш керакки, Бухоро вилоятида Саудия компанияси томонидан умумий қиймати 1,3 миллиард доллар бўлган шамол электр станцияларини қуриш лойиҳаси амалга оширилмоқда.
Айни пайтда мазкур лойиҳа доирасида потенциал кредиторлар билан музокаралар ўтказилиб, объектларда қўшимча тадқиқот-ўрганишлари олиб борилмоқда.
Муҳокама давомида Қорақалпоғистон Республикасида 100 МВт қувватга эга шамол энергетикаси лойиҳасининг бориши кўриб чиқилди. Қайд этиш керакки, “ACWA Power” компанияси мазкур шамол электр станцияси орқали ишлаб чиқарилган электр энергияси учун паст бўлган, яъни электр энергиясининг 1 кВт.соати учун 2,57 цент тарифини таклиф қилиб, тендер ғолиби бўлди. 2021 йилнинг 17 декабрь куни Саудия компанияси билан электр энергиясини сотиб олиш тўғрисида шартнома имзоланди.
Учрашув давомида Mуҳаммад Абунаян “ACWA Power” компаниясининг водород энергетикаси бўйича ҳамкорликдаги лойиҳаларни амалга оширишга катта қизиқишини таъкидлади.
Хусусан, “Air Products” халқаро компанияси иштирокида ушбу йўналишда уч томонлама ҳамкорлик имзоланди.
Учрашув якунида томонлар лойиҳаларни белгиланган жадвал асосида амалга ошириш мақсадида мутахассислар томонидан мавжуд масалаларни батафсил ўрганиш бўйича келишувга эришдилар.
Ўзбекистон Республикаси
Энергетика вазирлиги Матбуот хизмати
1000
