Делегацияга “ACWA Power” компанияси бошқаруви раиси Муҳаммад Абунаян бошчилик қилди.
Ташриф Ширин энергетика коллежининг бугунги фаолияти ва у ердаги таълим жараёни ҳамда сифати билан яқиндан танишишга қаратилди. Саудиялик меҳмонларга Ширин энергетика коллежида жорий қилинган таълим тизими ҳамда ўқитиш методикаси ҳақида маълумотлар берилди.
Ўқув масканида меҳмонлар ва шаҳар маъмурияти раҳбарлари, бир гуруҳ педагог ходимлар иштирокида анжуман ташкил этилди. Анжуман давомида “NОМАC” компаниясининг Ўзбекистондаги лойиҳа менежери Ҳоссем Аҳмад ҳамда коллеж директори ва ўқитувчилари томонидан “ACWA Power” компанияси ҳомийлигида амалга оширилган реконструкция ишлари, коллежда ўқувчиларнинг таълим олишлари учун яратилган замонавий шароитлар ҳақида тақдимотлар қилинди.
Анжуман якунида Саудия Арабистонининг “ACWA Power” компанияси бошқаруви раиси Муҳаммад Абунаян коллежда йўлга қўйилган ўқитиш тизимини ижобий баҳолади. У коллеж маъмуриятидан ўқув йили давомида ўз билими ва салоҳияти билан бошқа ўқувчиларга ўрнак бўлаётган ўқувчилар, ҳар тарафлама ташаббускор ва фидоий ўқитувчиларни аниқлаб беришни сўради. У танловда ғолиб чиққан ўқитувчи ва ўқувчининг ҳар иккисига рағбатлантириш мақсадида компания номидан “Умра” сафарига икки кишилик бепул йўлланма тақдим этилишини билдирди.
Тадбирдан сўнг делегация Ширин шаҳар ҳамда Боёвут туманларига туташ бўлган ҳудудда барпо этилаётган янги иссиқлик электр станцияси қурилишида олиб борилаётган қурилиш-монтаж ишлари ҳамда лойиҳанинг бугунги ҳолати билан яқиндан танишдилар.
Маълумот ўрнида, лойиҳага “ACWA Power” компанияси томонидан 1,2 млрд доллар ҳажмида тўғридан-тўғри инвестиция киритилган бўлиб, электр станция йилига 12 млрд кВт.соат қўшимча электр энергия ишлаб чиқаради. Объект 2023 йилнинг тўртинчи чорагида фойдаланишга топширилиши режалаштирилган.
“Сирдарё ИЭС” АЖ матбуот хизмати
761
