2022 йилнинг 24 февраль куни “Ҳудудий электр тармоқлари” АЖ ва Тошкент шаҳридаги “Tashkent International University of Education” ўртасида тизим учун малакали кадрлар етиштириш ҳамда қайта тайёрлаш хусусида ўзаро ҳамкорлик тўғрисида меморандум имзоланишига бағишланган тадбир бўлиб ўтди.
Тадбирда “Ҳудудий электр тармоқлари” АЖ мутасаддилари, тегишли мутахассислар ва ишчи-ходимлар ҳамда университет вакиллари иштирок этдилар.
Жамият Бошқарув раисининг биринчи ўринбосари Жаҳонгир Обиджонов тадбирда сўз олиб, бугун изчил ривожланаётган иқтисодиётимиз, хусусан электр энергетикаси тизими учун малакали муҳандис ва ходимлар етиштириш масаласи долзарб эканлигини таъкидлади.
Шу маънода бугун имзоланиши кўзда тутилаётган меморандум “Ҳудудий электр тармоқлари” АЖ учун етук малакали кадрлар тайёрлаш масаласида “Tashkent International University of Education” билан ҳамкорликни йўлга қўяди, – дейди Ж. Обиджонов. – Ушбу ҳужжатга асосан ўқув муассаси Жамият учун малакали кадрлар тайёрлаш, уларнинг малакасини доимий ошириб бориш ҳамда касбий кўникмаларини янада ривожлантириш бўйича ишларни олиб боради.
Ўз навбатида “Tashkent International University of Education” ректори Носир Ходжаев, бугунги кунда мамлакатимизда юқори малакали мутахассислар тайёрлаш сифатини ошириш, таълим жараёнига рақамли ва педагогик технологиялар ҳамда замонавий усулларни кенг жорий этишга алоҳида эътибор қаратилаётганига тўхталиб ўтди.
Электр энергетикаси тизимини янада ривожлантириш борасида соҳа олдида турган устувор вазифалардан келиб чиққан ҳолда, замонавий билим ва кўникмаларга эга юқори малакали кадрларни миллий ва халқаро стандартларга мувофиқ сифатли тайёрлаш, ушбу жараёнга илғор таълим технологиялари жорий этиш, илмий-амалий тадқиқотлар олиб боришда республика ва хорижий етакчи олий таълим ва илмий-тадқиқот муассасалари билан ҳамкорлик қилиш масалаларига алоҳида эътибор қаратилади.
Тадбирда таъкидланганидек, мазкур ҳужжат орқали томонлар технологик муаммолар доирасида илмий-тадқиқотлар ташкил этиш ва уларда иштирок этиш, ўқув-сайёр машғулотлари ва малакавий амалиётларни ўтказиш ҳамда мунтазам равишда соҳага оид адабиётлар ва бошқа нашрлар алмашиниш каби йоъналишларда ҳам ҳамкорлик олиб борилади.
Учрашув сўнггида ҳамкорлик тўғрисидаги меморандум имзоланди.
“Ҳудудий электр тармоқлари” АЖ Матбуот хизмати.
747
