“Иссиқлик электр станциялари” АЖ Бошқарув раиси бошчилигида тизим корхоналарининг раҳбарлари ҳамда масъул ходимлари иштирокида ўтган видеоселектор йиғилишида маълум қилинишича, ҳозирги кунда мамлакатимизда ишлаб чиқарилаётган электр энергиясининг 90 фоизини етказиб бераётган иссиқлик электр станциялари ва марказларида 2022 йил режасига асосан жами 30 та объектда, шу жумладан, 12 та энергоблок, 1 та турбоагрегат, 9 та козонагрегати, 7 та БГҚ, 1 та ГТҚ таъмирлаш ишлари амалга оширилиши кўзда тутилган.
“Иссиқлик электр станциялари” АЖ ишлаб чиқариш бош бошқармаси бошлиғи вазифасини бажарувчи Ғолиб Салимёровнинг таъкидлашича, бундан ташқари ИЭС ва ИЭМлар энергоқурилмаларида режали жорий таъмирлаш ишлари олиб борилади, бунда 35-110-220-500 кВ кучланишли очиқ тақсимот қурилмаларида (ОТҚ), энергообъектлар темир йўлларида, бино ва иншоотларда ҳамда барча ёрдамчи қурилмаларни ишончли ва барқарор ишлашини таъминлаш мақсадида ишлаб чиқарилган жадвал-режасига асосан ишлар олиб борилади.
Шу билан бирга, жорий таъмирлаш мавсумини сифатли ташкил этиш бўйича ходимлар ва мутахассислар малакасини ошириш ишлари ҳам амалга оширилмоқда.
Станция ва марказларда 2022 йилда капитал, ўрта ва жорий таъмирлаш ишларини амалга ошириш учун таъмирлаш фондининг прогноз ҳажми 1 трлн. сўмдан ортиқ, шу жумладан эҳтиёт қисмлар ва бошқа товар-моддий бойликлар учун 751,8 млрд. сўм, меҳнат ҳаражатлари учун 251,7 млрд. сўмни ташкил қилмоқда.
Таъмир ва модернизация ишлари бажарилиши натижасида иссиқлик электр станцияларида электр энергияси ишлаб чиқариш қувватларини 237 МВт ҳамда иссиқлик энергияси ҳажмини эса 301 тонна/соатга оширишга эришиш кўзда тутилган.
Йиғилишда таъмирлаш ишлари давомида ижро интизомини таъминлаш, белгиланган иш режага тўлиқ риоя этиш, созлаш ишларини сифатли амалга ошириш бўйича тегишли топшириқлар берилди.
“Иссиқлик электр станциялари” АЖ Матбуот хизмати
934
