2022 йил 3 март куни Ўзбекистон “Марказий ва Ғарбий Осиё энергетика соҳасида аёллар. 2030 йилга бориб тенглик – бу ўзгариш вақти” мавзусида онлайн форматда бўлиб ўтган биринчи саммитда иштирок этди.
Онлайн саммит давомида Марказий ва Ғарбий Осиёда энергетика соҳасида аёллар ролини ошириш ва уларни рағбатлантириш бўйича биринчи мақсадли ташаббус ҳисобланган “Энергетикада аёллар” дастурининг расмий очилиш маросими бўлиб ўтди.
Дастур Ўзбекистон Республикаси Энергетика вазирлиги раислигида Тошкентда бўлиб ўтган Марказий Осиё мамлакатлари иқтисодий ҳамкорлигига аъзо давлатлар энергетика вазирларининг биринчи мулоқоти декларациясида белгиланган энергетика соҳасида гендер тенглигига эришиш бўйича минтақавий энергетика вазирлари томонидан қабул қилинган мажбуриятларга бағишланган.
Дастурнинг мақсади – “2030 йилгача тенглик” концепцияси тамойилларини минтақада 2030 йилга қадар энергетика саноатининг ишлаши учун шарт-шароитлар яратиш, тенг имкониятлар, тенг иш ҳақи ва тенг етакчиликни янги стандарт сифатида тақдим этиш кабилар ҳисобланади.
Энергетика вазирлигининг Ташқи иқтисодий фаолият бошқармаси бошлиғи Жамола Хусанжанова саммит давомида тингловчилар билан бевосита мулоқот қилиш бўйича махсус белгиланган дастурда “Қайта тикланувчи энергия манбалари ва энергия самарадорлиги соҳасидаги янги устувор йўналишлар соҳада ишчи кучини диверсификация қилиш учун янги имкониятлар очмоқда. “Яшил” энергетика томонидан тақдим этилган янги имкониятларнинг пайдо бўлиши, бошқа нарсалар қатори, аёлларга кўпроқ энергетика бозорида юқори лавозимларни эгаллаш имкониятини бериши керак” дея таъкидлади.
Саммитда Марказий ва Ғарбий Осиё мамлакатлари ҳамда бошқа давлат идоралари, назорат қилувчи органлар, энергетика сиёсатини шакллантириш ва амалга ошириш учун масъул бўлимлар, жамоат ташкилотлари ва таҳлил марказлари, инвестиция, саноат, банк ва бошқа тузилмалар вакиллари иштирок этди.
Ўзбекистон Республикаси
Энергетика вазирлиги Матбуот хизмати
992
