2022 йилнинг 25 март куни Ўзбекистон Энергетика вазирлигида “Masdar” компанияси (БАА) бош директори Муҳаммад Жамил Ал Рамоҳи бошчилигидаги делегация аъзолари билан музокаралар бўлиб ўтди.
Томонлар амалга оширилаётган лойиҳаларнинг бориши, шунингдек, бир қатор йўналишлар бўйича ҳамкорликни ривожлантириш, хусусан, қайта тикланувчи энергетика объектларида ишлаб чиқариладиган энергияни сақлаш технологияларини муҳокама қилдилар.
Эслатиб ўтамиз, “Masdar” компанияси 2021 йилнинг август ойида Навоий вилоятида фойдаланишга топширилган қуввати 100 МВт бўлган Ўзбекистондаги биринчи қуёш фотоэлектр станцияси лойиҳасини муваффақиятли амалга оширди. Мамлакатимиздаги биринчи саноат миқёсидаги мазкур қуёш фотоэлектр станциясининг ишга туширилиши Ўзбекистон Мустақиллигининг 30 йиллиги арафасида Президентимиз Шавкат Мирзиёев иштирокида бўлиб ўтди.
БАА компанияси Ўзбекистонда қайта тикланувчи энергия манбалари соҳасида умумий қуввати 1 497 МВтга тенг бўлган қатор лойиҳаларни, жумладан, Самарқанд вилоятида 220 МВт, Жиззах вилоятида 220 МВт, Сурхондарё вилоятида 457 МВт қувватга эга қуёш фотоэлектр станциялари ва Навоий вилоятида 500 МВт қувватли шамол электр станцияларини амалга оширишни режалаштирмоқда.
Ўзбекистон Республикаси
Энергетика вазирлиги Матбуот хизмати
568
