Қайта тикланувчи энергия манбалари лойиҳаларини амалга оширишни жадаллаштириш мақсадида Ўзбекистон ҳукумати Халқаро молия корпорацияси (ХМК) ва Европа тикланиш ва тараққиёт банки (ЕТТБ) билан ҳамкорликда янги шартномалар имзолади.
Маълумки, 2020 йилда мамлакатимиз ҳукумати томонидан 10 йил ичида – 2030 йилга қадар қуёш фотоэлектр станциялари (ФЭС) қувватини 5 ГВтгача ва шамол электр станциялари (ШЭС) қувватини 3 ГВтгача етказиш вазифаси қўйилган. Бу мақсадлар Энергетика вазирлиги томонидан 2020 йилда ишлаб чиқилган 2020-2030 йилларда электр энергетика тармоғини ривожлантириш концепциясида белгиланган эди.
2021 йилда қайта тикланувчи энергия манбалари лойиҳалари бўйича тендерда киритилган таклифларни, шу жумладан, мамлакатимиз аҳолиси ва иқтисодиёти учун фойдали бўлган тариф таклифлари таҳлили асосида, Ўзбекистон Республикаси Президенти томонидан 2026 йилга қадар ФЭС қувватини 4 ГВт ва ШЭС қувватини ҳам 4 ГВтгача (жами 8 ГВт) ошириш бўйича топшириқлар берилди.
Ушбу мақсадларга эришиш учун Халқаро молия корпорацияси ва Европа тикланиш ва тараққиёт банки билан қўшимча 1 ГВт қувватга эга қуёш ва шамол электр станцияларини қуриш лойиҳалари учун инвесторларни танлов асосида танлаш бўйича консалтинг хизматларини олиш доирасида ҳар бир институт билан ҳамкорликни кенгайтиришга қарор қилинди.
Эслатиб ўтамиз, 2018 ва 2019 йилларда ҳам ХМК ва ЕТТБ билан шунга ўхшаш шартномалар имзоланган эди.
Ўзбекистон Республикаси
Энергетика вазирлиги Матбуот хизмати
568
