Президентимиз томонидан 2022 йил 18 март куни “Қорақалпоғистон Республикаси Қораўзак туманида қуввати 100 МВт бўлган шамол электр станциясини давлат-хусусий шериклик шартлари асосида қуриш ва бошқариш” лойиҳасини амалга ошириш чора-тадбирлари тўғрисида”даги ПҚ-169-сонли қарор имзолади.
Европа тикланиш ва тараққиёт банки кўмагида ўтказилган Халқаро тендерда Саудия Арабистонининг “ACWA Power” компанияси 1 киловатт-соат электр энергияси учун 2,5695 АҚШ центи тариф таклифи билан ғолиб деб топилган эди.
Лойиҳа доирасида Инвестор шамол электр станциясини ягона электр энергияси тармоғига улаш учун қуриладиган ҳаво электр узатиш тармоқлари, оширувчи подстанция ва ўчириб-ёқиш пунктини қуриш ҳамда ишга туширилгандан сўнг уларни “Ўзбекистон миллий электр тармоқлари” АЖга топширади.
Лойиҳа қиймати 107,8 миллион долларни ташкил этиб, давлат-хусусий шериклик шартлари асосида юз фоиз инвестор (“ACWA Power”) томонидан молиялаштирилади.
Мазкур электр станция 2024 йилда ишга туширилади. У ишга тушгач йилига 350 миллион киловатт-соат электр энергияси ишлаб чиқариб, 120 мингдан ортиқ хонадонни электр энергияси билан таъминлайди.
Аҳамиятлиси, станция ишга тушгач йилига 106 миллион куб метр табиий газ тежалишига эришилади ҳамда атмосферага 160 минг тонна зарарли чиқиндиларнинг чиқишини олди олинади. Тежалган газ билан 35 мингта хонадонни 1 йил давомида табиий газ билан таъминлаш мумкин.
Мазкур янги шамол электр станцияси қурилиши давомида 400 нафар ишчи-ходимлар фаолият юритади ва станция ишга тушгач, 30 та янги ўрни яратилади.
Ўзбекистон Республикаси
Энергетика вазирлиги Матбуот хизмати
595
