Ўзбекистон Республикаси Президентининг 2022 йил 4 март кунидаги видеоселектор йиғилишидаги топшириқлари ижросини таъминлаш мақсадида “Тўрақўрғон ИЭС” УКда талабаларни меҳнат ҳақи тўлаш шарти билан ишлаб чиқариш амалиётига жалб этиш бўйича танлов ташкил этилди.
Янги қурилган замонавий электр станциясига Наманган муҳандислик-қурилиш институти энергетика факультетининг 50 нафардан ортиқ учинчи ва тўртинчи босқич талабалари, факультет деканати раҳбарлари, энергетика кафедраси профессор ва ўқитувчилари ташриф буюрдилар.
Тадбир аввалида мутахассислар томонидан “Иссиқлик электр станциялари” акциядорлик жамияти ҳамда Тўрақўрғон иссиқлик электр станцияси тўғрисида видеотақдимот ўтказилди. “Иссиқлик электр станциялари” АЖ мутахассислари талабаларни қизиқтираётган масалалар бўйича – Ўзбекистонда иссиқлик энергетикасининг ҳозирги ҳолати ва ривожланиш даражаси, жаҳон энергетикаси тараққиёти тенденциялари, мамлакатимизда бошқа муқобил энергия, шу жумладан, қайта тикланувчи энергия манбалари имкониятларидан кенг фойдаланиш истиқболлари тўғрисида атрофлича жавоб бердилар.
Тадбир якунида соҳа мутахассислари томонидан таълим муассасаси ўқитувчиларининг бевосита иштирокида тўртинчи босқич талабалари учун тест синовлари, учинчи босқич талабалари учун эса суҳбат ташкил қилинди, уларнинг натижаларига кўра, электр станциясида ишлаб чиқариш амалиётини ўташга жалб қилинадиган етарли тайёргарлик ҳамда салоҳиятга эга бўлган 9 нафар талабалар саралаб олинди.
Тадбир давомида станция цехлари ва участкаларида ташкил этилган экскурсия талабаларда чуқур таассурот қолдирди. Томонлар электр станцияси ҳамда олий таълим муассасасининг энергетика факультети ўртасида келгусидаги алоқаларни ва ҳамкорликни кенгайтириш ва мустаҳамлаш тўғрисида келишиб олдилар.
“Иссиқлик электр станциялари” АЖ Матбуот хизмати
620
