Энергетика вазирлиги, “Иссиқлик электр станциялари” АЖ ва “Тахиатош ИЭС” АЖ томонидан Қорақалпоғистон Республикасининг Тахиатош шаҳрида бунёд этилган барча шароитларга эга, замонавий тиббий диагностика маркази ҳамда тикувчилик цехи Қорақалпоғистон Республикаси Соғлиқни сақлаш вазирлиги тасарруфига беғараз топширилди.
Аввалроқ, “Тахиатош ИЭС” АЖ таркибида тиббий диагностика маркази ҳамда тикувчилик цехи қуриб фойдаланишга топширилганлиги ҳақида хабар берилган эди.
Ўзбекистон Республикаси Президенти Шавкат Мирзиёев томонидан илгари сурилган “Инсон қадри учун” ғоясини ҳаётга татбиқ этиш ҳамда 2022-2026 йилларга мўлжалланган Янги Ўзбекистоннинг Тараққиёт стратегиясини “Инсон қадрини улуғлаш ва фаол маҳалла йили”да амалга оширишга оид давлат дастури ижросини таъминлаш мақсадида марказни Қорақалпоғистон Республикаси Соғлиқни сақлаш вазирлиги тасарруфига беғараз топшириш ҳамда ундан Қорақалпоғистон Республикаси аҳолиси кенг фойдаланишига шароит яратиш бўйича қарор қабул қилинди.
Диагностика маркази бош шифокори Табассум Рузметованинг таъкидлашича, муассаса энг замонавий ускуналар билан жиҳозланган, жумладан, замонавий МРТ, электрокардиограмма, видеоэндоскопия, ультразвук диагностикаси, стомотология ва бошка тиббий қурилмалар ёрдамида етарли тажрибага эга бўлган тиббий ходимлар томонидан аҳолига хизмат кўрсатиш ишлари йўлга қўйилган.
Тиббиёт марказида соҳага оид изланишлар олиб бориш, хорижий мутахассисларни жалб этган ҳолда тиббий амалиётлар ва юқори технологик муолажаларни ташкил этиш, ҳудуддаги тиббиёт мутахассислари малакасини ошириш бўйича ишларни ташкил этиш ҳам белгиланган.
Тикувчилик цехини ташкил этиш орқали хотин-қизларнинг бандлигини таъминлаш, энг чекка ҳудудларда истиқомат қилаётган аёлларга тадбиркорликнинг сир-асрорларини ўргатиш ва бу орқали оилалар фаровонлигини таъминлашга алоҳида эътибор қаратилиши кўзланган.
Бу ерда асосан ишлаб чиқариш корхоналари ва ташкилотлар учун махсус кийим-бошлар тайёрланиши йўлга қўйилган.
Иккала лойиҳа доирасида 65 та янги иш ўринлари яратилади.
“Иссиқлик электр станциялари” АЖ Матбуот хизмати.
907
