“Ҳудудий электр тармоқлари” АЖ бошқаруви раиси ташаббуси билан жорий йилда манзилли дастур асосида республикадаги 110/35/10 кВ кучланишли подстанцияларнинг умумий ҳолатини ўрганиш, хусусан, уларнинг техник ҳужжатларини тартибга солиш, подстанцияларда АСКУЭ тизими жорий этилганлиги ҳолатини ўрганиш, подстанция хизматидаги ходимлар ишини ташкил қилиш, электр ускуна ва биноларини мукаммал ҳамда жорий таъмирлаш, атроф-ҳудудини ободонлаштириш ҳамда бошқа амалий ишларни ҳал этиш бўйича ишчи гуруҳ ташкил қилинди.
Мазкур ишчи гуруҳ томонидан март ойининг охири – апрель ойи бошларида Водий вилоятларидаги ана шундай подстанциялар ҳолати ўрганилиб, жойларда тизим мутахассислари, Подстанциялар, Релели ва ҳимоя автоматика, Юқори кучланишли тармоқлар, Тезкор-диспечерлик, Мустаҳкамлик ва хафвсизлик хизматлари, Электр энергиясини назорат қилиш, АСКУЭ бўлимлари ва шаҳар, туман электр таъминоти корхонаси бош муҳандислари иштирокида семинарлар ташкил этилди.
“Ҳудудий электр тармоқлари” АЖ Электр тармоқларидан фойдаланиш бош бошқармаси бошлиғи А. Ниматуллаев бошчилигидаги ишчи гуруҳ томонидан дастлаб Янги Наманган туманидаги “Шимолий” подстанциясида бўлиб, бу ерда ташкил этилган иш жараёнларини ўрганилди. Ўрганишлар натижасида аниқланган камчиликлар юзасидан тегишли тавсиялар берилиб, белгиланган топшириқларни босқичма-босқич бажариш бўйича зарур тушунтириш ишлари олиб борилди.
Кейинги манзил сифатида Фарғона вилояти танлаб олинди.
“Фарғона ҳудудий электр тармоқлари корхонаси” АЖ таркибидаги масъул бўлим, хизматларда меҳнат қилаётган ишчи-ходимлар учун ташкил этилган ўқув-семинарда амалга оширилиши зарур бўлган муҳим вазифаларга алоҳида тўхталиб ўтган ишчи гуруҳ аъзолари вилоятдаги мавжуд 110/35 кВли подстанцияларни тўлиқ кўрикдан ўтказиш борасидаги ишларни тизимли ташкил этиш кераклигига йиғилганлар эътиборини қаратдилар.
Таъкидланганидек, подстанциялардаги электр қурилмалар жорий ва мукаммал таъмирланиши, эстетик ҳолати яхшиланиши орқали иш самарадорлиги янада ортиб, истеъмолчиларга барқарор электр энергияси етказиб беришда ижобий натижаларга эришилади
Шу ўринда Фарғона шаҳри ва туманларини электр энергияси билан таъминловчи 110/35/6 кВли “Қувасой” подстанциясида бу борадаги дастлабки ишлар бошланганини қайд этиб ўтиш жоиздир.
Худди шу каби ўқув-семинар “Андижон ҳудудий электр тармоқлари корхонаси” АЖ томонидан ҳам ташкил этилди.
Ишчи гуруҳ томонидан Андижон туманида жойлашган 110/35/10 кВли “Оҳунбобоев” подстанцияси намунавий ҳолатга келтириш учун танлаб олиниб, бу ерда техник ҳужжатларнинг олиб борилиши ва уларда АСКУЭ тизимининг жорий этилганлиги, тармоқ жадвалларини тузиш, ҳисоб-китобларнинг тўғрилиги, ходимлар томонидан хавфсизлик техникасига амал қилган ҳолда ишлар ташкил қилиниши ва бошқа қатор муҳим йўналишлардаги вазифалар бўйича чора-тадбирлар ишлаб чиқилиб, бўлим ва хизмат бошлиқларига топшириқлар берилди.
Ушбу подстанцияда таъмирлаш ишлари тўлиқ якунлангандан сўнг вилоят миқёсида техник ходимлар иштирокида кўргазмали семинар ўтказилиши ҳам белгилаб олинди.
Таъкидлаш лозимки, Ишчи гуруҳи томонидан бу каби ўрганишлар республикамиздаги барча подстанцияларда олиб борилади.
Вилоят Матбуот хизматлари материаллари асосида тайёрланди.
897
