Ўзбекистонда янги электр станцияларни қуриш лойиҳаларида юқори технологияли, замонавий энергия тежовчи ускуналардан фойдаланилмоқда. Соҳа ходимларининг малакасини ошириш мақсадида Энергетика вазирлиги томонидан тизимли равишда асбоб-ускуналар ишлаб чиқарувчи корхоналар вакиллари иштирокида ўқув машғулотлари ўтказилмоқда.
Хусусан, Тошкент, Бухоро, Хоразм ва Сирдарё вилоятларида иссиқлик электр станциялари (ИЭС) қуриш лойиҳаларида “Wartsila” (Финляндия) газ-поршенли агрегатларидан фойдаланиш кўзда тутилган.
Жорий йилнинг 5 апрель куни мазкур ускуна технологияларидан фойдаланиш ва имкониятлари билан атрофлича танишиш мақсадида Энергетика вазирлиги “Wartsila” компанияси билан биргаликда тармоқ кодлари ва захира қувватларидан фойдаланиш бўйича семинар ташкил қилинди.
Ўқув машғулотларида таъкидланганидек, бугунги кунда электр тармоқлари барқарорлигини таъминлашга хизмат қилувчи ишлаб чиқариш қувватларининг мослашувчанлиги катта аҳамиятга эга. Компания вакиллари, ушбу замонавий газ-поршенли қурилмаларини қисқа муддат ичида тармоққа улаш ва ўчириш имкониятлари мавжудлигини таъкидладилар.
Семинар давомида электр станцияларнинг диспетчер ва техник ходимлари ушбу ускунанинг имкониятлари билан танишдилар, ускуналар эксплуатацияси ва уларга хизмат кўрсатишга оид бир қатор масалаларни муҳокама қилдилар, шунингдек, жиҳозларга техник хизмат кўрсатиш ва уларнинг иш режимлари бўйича ўзларини қизиқтирган саволларга жавоб олдилар.
Ўзбекистон Республикаси
Энергетика вазирлиги Матбуот хизмати
728
