Ассалому алайкум, ҳурматли телетомошабинлар!
Ушбу брифинг орқали сўнгги йилларда юртимизда иссиқлик, қуёш ва шамол электр станцияларини қуриш бўйича Президентимиз томонидан имзоланган 17 та қарор асосидаги лойиҳалар ҳақида маълумот берамиз.
Сўнгги 3 йил ичида умумий қуввати 8 905 мегаваттга тенг бўлган иссиқлик, қуёш ва шамол электр станцияларини қуриш бўйича халқаро компаниялар билан ҳамкорликда 19 та битим имзоланди.
Ушбу лойиҳаларнинг умумий қиймати 6 миллиард 919 миллион АҚШ долларни ташкил этиб, уларнинг барчаси хорижий компаниялар томонидан тўғридан-тўғри инвестициялар ҳисобига амалга оширилади.
Таъкидлаш жоизки, сўнгги йилларда юртимизда “яшил” иқтисодиёт, хусусан “яшил” энергетикани ривожлантиришга алоҳида эътибор қаратилмоқда.
Бу борада қайта тикланувчи энергия манбалари асосида электр энергиясини ишлаб чиқариш ҳажмларини ошириш бўйича дадил қадам ташланди.
Хабарингиз бор, ушбу саъй-ҳаракатлар натижасида 2021 йилнинг август ойида Навоий вилоятининг Кармана туманида биринчи 100 мегаватт қувватли йирик қуёш фотоэлектр станцияси ишга туширилди. Жорий йилнинг апрель ойида Самарқанд вилоятининг Нуробод туманида 100 мегаватт қувватли иккинчи қуёш фотоэлектр станцияси ишга туширилади.
Шунингдек, 2023 йил якунига қадар умумий қуввати 1 197 мегаватт бўлган 5 та, хусусан Қорақалпоғистон Республикасининг Қораўзак туманида қуввати 100 мегаватт бўлган шамол электр станцияси, Сурхондарё вилоятининг Шеробод туманида қуввати 457 мегаватт, Жиззах вилоятининг Ғаллаорол туманида қуввати 220 мегаватт, Самарқанд вилоятининг Каттақўрғон туманида қуввати 220 мегаватт ва Навоий вилоятининг Нурота туманида қуввати 200 мегаватт бўлган қуёш фотоэлектр станциялари ишга туширилади.
2024 йилда Бухоро вилоятининг Пешку ва Ғиждувон туманларида ҳар бирининг қуввати 500 мегаваттдан бўлган 2 та (жами 1 000 МВт) ва Навоий вилоятининг Томди туманида қуввати 500 мегаватт бўлган шамол электр станциялари ишга туширилади.
Шунингдек, юртимизда янги ва замонавий иссиқлик электр станцияларини қуриш бўйича 7 та қарор имзоланган. Унга кўра, жорий йилнинг ўтган уч ойида учта вилоятда умумий қуввати 1 154 мегаватт бўлган 5 та янги иссиқлик электр станцияси ишга туширилди.
Шу билан бирга, жорий йил декабрь ойига қадар Сирдарё вилоятининг Ховос туманида қуввати 220 мегаватт бўлган янги иссиқлик электр станцияси ишга туширилади.
2023 йил якунига қадар Сирдарё вилоятининг Ширин шаҳрида қуввати 1 500 мегаватт, 2024 йил якунига бориб эса Сурхондарё вилоятининг Ангор туманида қуввати 1 560 мегаватт бўлган янги иссиқлик электр станциялари ишга туширилади.
Таъкидлаш керакки, тизимли ишлар натижасида 2026 йилга бориб юртимизда умумий қуввати 8 000 мегаваттга тенг бўлган қуёш ва шамол электр станциялари, 868 мегаватт қувватга эга гидроэлектр станциялари ҳамда 6 008 мегаваттга тенг янги иссиқлик электр станциялари ишга туширилади. Натижада Ўзбекистонда ишлаб чиқариш қувватлари 27 400 мегаваттга етказилади.
Солиштириш учун айтиш мумкинки, 1991 йилдан 2016 йилга қадар яъни 25 йилда 3 300 мегаватт қувватлар ишга туширилган бўлса, 2017-2026 йиллар давомида, яъни охирги 10 йилда 18 324 мегаватт ёки беш ярим баравар кўп янги қувватлар ишга туширилади.
Эътиборингиз учун раҳмат!
993
