2022 йилнинг 27 апрель куни Ўзбекистон Энергетика вазирлиги раислигида Иқтисодий ҳамкорлик ташкилотига (ИҲТ) аъзо давлатлар экспертлар гуруҳининг қайта тикланувчи энергия манбалари бўйича 4-йиғилиши онлайн тарзда бўлиб ўтди.
ИҲТ Бош котиби Хусрав Нозири ушбу муҳим тадбирга мезбонлик қилгани учун Ўзбекистон Республикаси Энергетика вазирлигига самимий миннатдорлик билдирди.
“Ишончим комилки, бизнинг ҳамкорлигимиз қайта тикланувчи энергия манбалари ва энергия самарадорлиги бўйича ИҲТ энергетика кун тартибини қайта кўриб чиқишга, аъзо давлатларнинг умумий манфаатларидан келиб чиққан ҳолда белгиланган мақсадларни ривожлантириш ва барқарор энергияга ўтиш бўйича минтақавий ҳамкорликнинг ҳозирги ва келгусидаги истиқболларини қамраб олиш имконини беради”, - деди ИҲТ раҳбари.
Шунингдек, Х.Нозири, ИҲТ ҳудудида барқарор энергетикага ўтиш бўйича минтақавий ҳамкорликни ривожлантириш муҳимлигини алоҳида таъкидлади.
“Хусусан, трансчегаравий ҳамкорлик ва ўзаро боғланган энергия тизимлари энергия харажатларини камайтириши, ишончлилигини ошириши ва углерод чиқиндиларини камроқ харажат билан камайтириши, шу билан бирга тоза энергия манбалари, хусусан, гидро, шамол ва қуёш энергияси ўртасидаги улуш ва синергияни ошириши мумкин”, - деди у.
Учрашувда меҳмон маърузачи сифатида ЮНИДО (БМТнинг Саноатни ривожлантириш ташкилоти) катта маслаҳатчиси жаноб Алфред Хатзенбург энергия самарадорлиги ва унинг иқлимни яхшилаш ва чиқиндиларни камайтиришдаги роли ҳақида тақдимот қилди.
Ўзбекистон яқин 10 йилда қайта тикланувчи энергия манбалари улушини 3 баробарга оширишни мақсад қилган. Республика 2030 йилга бориб электр энергияси ишлаб чиқаришни икки баробарга, яъни 32 ГВтгача оширишни ва электр энергиясининг камида 25 фоизини қайта тикланувчи энергия манбаларидан олинишини режалаштирмоқда. Йиғилишда бу ҳақда энергетика вазири ўринбосари Шерзод Ходжаев таъкидлади.
Ўзбекистон Энергетика вазирлиги ҳузурида Қайта тикланувчи энергия манбалари миллий илмий-тадқиқот институти ва Водород энергетикаси илмий-тадқиқот маркази ташкил этилди. Бу соҳаларни ривожлантиришда республика халқаро ҳамкорликка таянади.
Ш.Ходжаев ҳар бир мамлакат энг яхши жаҳон тажрибасидан келиб чиққан ҳолда энергетикага ўтишнинг ўзига хос йўлини танлаши зарурлигини таъкидлади. “Яшил ўсиш” ва декарбонизацияга эришиш учун энергетикага прагматик ўтиш муҳимлигини ҳам ҳисобга олиш керак.
Учрашувда ИҲТ аъзо давлатлари вакиллари қайта тикланувчи энергия манбаларини ривожлантириш соҳасида тажриба алмашиб, ушбу йўналишда ҳамкорликни янада ривожлантириш масалаларини белгилаб олдилар.
Ўзбекистон Республикаси
Энергетика вазирлиги Матбуот хизмати
542
