Ўзбекистон Республикаси Президентининг “Ўзбекистон Республикасида қайта тикланувчи ва водород энергетикасини ривожлантириш чора-тадбирлари тўғрисида” 2021 йил 9 апрелдаги ПҚ–5063-сон қарорига мувофиқ Энергетика вазирлиги ҳузурида ташкил этилган Қайта тикланувчи энергия манбалари миллий илмий-тадқиқот институтида Қайта тикланувчи (қуёш, шамол, биогаз, геотермал энергия ва бошқалар) ва водород энергетикаси технологияларини синаш ва сертификатлаш лабораторияси фаолияти йўлга қўйилди.
Бугунги кунда Институтда ушбу соҳада бир қатор илмий ва амалий ишлар олиб борилмоқда. Жумладан Осиё тараққиёт банкининг техник кўмаги асосида фотоэлектр модулларини синовдан ўтказиш лабораториясининг базавий ҳамда концептуал дизайни ишлаб чиқилиб, халқаро стандартлар талаблари асосида ўндан ортиқ замонавий ўлчов қурилмалари билан жиҳозланди.
Инновацион ривожланиш вазирлигининг илмий, инновацион ва тижоратлаштиришга тайёрлаш лойиҳалари асосида қуёш фотоэлектрик модулларини синовдан ўтказиш стендлари яратилиб Институт илмий ходимларини Япония, Германия, Испания, Хитой, Ҳиндистон, Россия давлатларининг синов лабораторияларида малакаси оширилди.
Ўзбекистон ҳудуди кескин континентал иқлимий минтақада жойлашганлиги, ёз ва қиш фаслларида кун давомида ҳаво ҳароратининг кескин ўзгаришлари, шунингдек ёғингарчилик кунларининг кўплиги қайта тикланувчи энергия манбаларидан фойдаланиш соҳасида юқори сифатли технологиялардан фойдаланишни талаб этмоқда.
Шу муносабат билан, Институтда қуёш фотоэлектр модулларини синовдан ўтказишга мўлжалланган лаборатория Ўзбекистон аккредитация маркази томонидан DSt IS0/IEC 17025-2019 стандарт талаблари асосида баҳоланди ва 2022 йил 18 апрелдан бошлаб 5 йил муддатга O'ZAK.SL.OI85-сон билан давлат реестрига киритилди.
Бунинг натижасида, мамлакатимизга чет давлатларидан олиб кирилаётган фотоэлектр модулларни чиқиш параметрларини синов лабораториясида ўлчаш натижалари асосида меъёрий ҳужжатларга мувофиқлиги аниқланади. Натижада Республикамизга сифатли фотоэлектр модулларни кириб келиши таъминланади.
Қуёш фотоэлектр модулларни синовдан ўтказиш лабораторияси DSt IS0/IEC 17025-2019 стандарт талаблари асосида баҳоланганлиги ва аккредитациядан ўтганлиги сабабли нафақат республикамиз, балки қўшни давлатлардан ҳам буюртма олиши ва уларнинг технологияларини синовдан ўтказиши мумкин.
Республикамизда ташкил этилган ва аккредитациядан ўтган Қуёш фотоэлектр модулларини синовдан ўтказишга мўлжалланган лаборатория Қуёш энергетикаси технологияларини синаш ва сертификатлаш соҳасидаги бошланғич қадам бўлиб ҳисобланади. Ушбу синов лабораторияси фаолияти кенгайтирилиб қайта тикланувчи энергия манбаларидан фойдаланиш соҳаси ривожланиши, юртимизда жаҳон стандартларига мос станциялар барпо этилишига ва бу истеъмолчиларни узлуксиз ҳамда сифатли электр энергияси билан таъминлашга хизмат қилади.
Ўзбекистон Республикаси
Энергетика вазирлиги Матбуот хизмати
2182
