Аввал хабар берганимиздек, станциянинг 370 МВт қувватга эга буғ-газ қурилмасида қисқа муддатли техник кўрик ишлари амалга оширилди. Бугун у ўз фаолиятини барқарор давом эттирмоқда.
Техник назорат ишлари доирасида жаҳон энергетика соҳасида кўп йиллик тажрибага эга IngerSoll Rand компанияси томонидан ишлаб чиқарилган Cameron 4 R3MSGPS – 4CG /15 газ сиқув компрессорларида бороскопик текширув ўтказилди.
Компрессорлардаги техник кўрик даврида аниқланган нуқсонлар малакали мутахассислар томонидан бартараф этилди. Хусусан, сиқув камераси ва мультипликаторларнинг назорат ўлчов асбобларидаги тебранишлар текширилди, мойли зичланишлар ва ажраткичлар қисмларидаги ишчи юзаларни тозалаш ишлари бажарилди.
Маълумки, 370 МВтли буғ-газ қурилмасини ишлатиш ва бошқариш жараёни тўлиқ автоматлаштирилган. Бугун техник кўрик ишлари муваффақиятли якунланиб, қурилма ягона электр таъминоти тизимига уланди.
- Мазкур қурилма ёқилғини нисбатан кам сарфлаши билан ажралиб туради, дейди БГҚ раҳбари Жамшид Қосимов. - Масалан, илгари 1 киловатт-соат электр энергиясини ишлаб чиқариш учун 400 грамм шартли ёқилғи талаб қилинган бўлса, эндиликда бу мақсад учун ўрта ҳисобда 223.5 грамм ёқилғи сарфланмоқда. Бунинг натижасида йилига 350,9 миллион кубометр табиий газ тежалмоқда. Бу, нафақат иқтисодий жиҳатдан, балки экологик нуқтаи назардан ҳам фойдалидир.
Маълумот учун, замонавий қурилмада ишлаш туфайли корхонада йилига 2,6 млрд кВт.соат электр энергияси, 110 минг ГКал иссиқлик энергияси ишлаб чиқариш имконияти яратилди.
“Иссиқлик электр стнциялари” АЖ Матбуот хизмати
800
