Энергетика вазирлиги: Экология устувор ҳисобланади

O‘zbekiston Respublikasi
Energetika vazirligi

E-mail: info@minenergy.uz

Ўзбекистон Энергетика вазирлиги қайта тикланувчи энергия манбалари лойиҳаларини ишлаб чиқишда нафақат электр станцияларини қуриш учун таклиф этилаётган объектлардаги, балки унинг атрофидаги 50 км радиусдаги экологик вазиятни ўрганиш ва мониторинг қилишга ҳам устувор аҳамият қаратади.

Жайрон, (англ. Goitered gazelle, лот. Gazella subgutturosa) (VU, Табиатни муҳофаза қилиш халқаро иттифоқи), 2021 йил 21 апрель

Ушбу ишлар Энергетика вазирлиги мутахассислари томонидан қатор маслаҳатчилар, эколог ва экспертлар билан биргаликда олиб борилмоқда. Электр станциясини ўраб турган барча биологик хилма-хиллик, чумолидан тортиб жайрон ва бургутгача, шунингдек, яқин атрофдаги ўсимликлар ва ер ости сувлари тўғрисида маълумотлар йиғилади.

Каменка-плясунья (ингл. Isabelline wheatear, лот. Oenanthe isabellina) (LC, Табиатни муҳофаза қилиш халқаро иттифоқи), 2021 йил 9 апрель

Масалан, Европа тикланиш ва тараққиёт банки (ЕТТБ) кўмагида Қорақалпоғистон Республикасида қуввати 200 МВтга яқин бўлган шамол электр станциясини (ШЭС) қуриш лойиҳаси бўйича ана шундай ишлар амалга оширилди.

Тадқиқотлар жараёнида лойиҳа атрофидаги ҳудудда ноёб бургут ва бургутлар, какликлар, қирғийлар, тўрғайлар ва чумчуқларнинг кам учрайдиган турлари, турна ва кўкқарғалар, тулки ва жайронлар топилди.

Осиё каклиги (инг. Chukar partridge, лот. Alectoris Chukar) (LC, Табиатни муҳофаза қилиш халқаро иттифоқи), 2021 йил 2 май

Кузатишлар натижаларига кўра, халқаро миқёсда тан олинган экспертлар томонидан экология ва биохилма-хилликни сақлаш бўйича барча халқаро меъёр ва стандартларга мос келадиган ҳисобот тайёрланди. Ўтказилган кузатишлар қушлар ва сутэмизувчиларнинг ҳаракатларини таҳлил қилиш мумкин бўлган минимал хавфларни аниқлаш ва уларни бартараф этиш режасини тайёрлаш имконини берди.

Тулки (ингл. Red Fox, лат. Vulpes vulpes) (LC, Табиатни муҳофаза қилиш халқаро иттифоқи), 2021 йил, 4 апрель

Уларни ўрганиш ва ҳисобот тайёрлаш жараёнига атроф-муҳитни муҳофаза қилиш ва биология соҳасида мамлакатимиздаги таниқли мутахассислар жалб этилди. Улар орасида биология фанлари доктори, Қорақалпоқ давлат университети экология ва тупроқшунослик кафедраси профессори вазифасини бажарувчи Ёқуб Аметов, Қуйи-Амударё Давлат биосфера резервати илмий-тадқиқот ишлари бўйича директор ўринбосари Оқилбек Тўраевлар ҳам бор.

Кўк турна (ингл. Common Crane, лат. Grus grus) (LC, Табиатни муҳофаза қилиш халқаро иттифоқи), 2021 йил, 4 апрель

Таъкидлаш жоизки, ушбу ҳисобот ва тайёргарликларсиз саноат миқёсидаги йирик шамол электр станциясини қуришнинг имкони бўлмас эди.

Шуни қўшимча қилиш керакки, Ўзбекистон Республикаси Энергетика вазирлиги томонидан Жаҳон банки, Халқаро молия корпорацияси, Осиё тараққиёт банки, Европа тикланиш ва тараққиёт банки каби нуфузли халқаро ривожланиш институтлари кўмагида қуёш ва шамол электр станцияларини қуриш лойиҳаларини амалга ошириш, шу жумладан уларнинг экологик экспертизасини ўтказиш бўйича лойиҳалар амалга оширилмоқда.