2022 йил 24 июнь куни Тошкент шаҳрида Шанхай Ҳамкорлик Ташкилотига аъзо давлатлар энергетика вазирларининг иккинчи йиғилиши бўлиб ўтди.
Форумни Ўзбекистон Республикаси энергетика вазирининг биринчи ўринбосари Азим Ахмедхаджаев ва Шанхай Ҳамкорлик Ташкилоти Бош котиби Чжан Мин кириш сўзи билан очди.
Шунингдек, йиғилишда Ҳиндистон, Қозоғистон, Хитой, Қирғизистон, Покистон, Россия, Тожикистон энергетика соҳаси етакчилари нутқ сўзлади.
А.Ахмедхаджаев Ўзбекистонда қайта тикланувчи энергетикани ривожлантириш ва иқтисодиётдаги “яшил” ўтишнинг глобал аҳамияти ҳақида маъруза қилди.
“Бир томондан, ишлаб чиқариш ҳажмларини доимий равишда кўпайтириш зарурати, иккинчи томондан, ҳар бир мамлакат учун иқлим ўзгариши жараёни билан боғлиқ реал муаммолар бугунги кунда бутун инсоният олдига ундан чиқишнинг мақбул йўлини топиш вазифасини қўйилмоқда. Яъни, тоза ва барқарор энергияга ўтишни таъминлаш вазифаси ҳар қачонгиданда долзарб аҳамиятга эга. Биз бу ерда – ШҲТга аъзо давлатлар энергетика вазирлари йиғилишида бу мавзуни муҳокама қилаётганимиз ҳам бежиз эмас, чунки “яшил” энергетикага ўтишнинг самарали йўлларини топиш масаласи глобал масала”, — деди у ўз нутқида.
Вазирлар йиғилиши якунида қабул қилинган баённомада ШҲТга аъзо давлатлар ўртасида энергетика соҳасида ҳамкорлик концепциясини амалга ошириш бўйича Ҳаракатлар режаси тасдиқланди ҳамда ШҲТга аъзо давлатлар ўртасида қайта тикланувчи энергия манбалари соҳасида ҳамкорлик дастури лойиҳаси тасдиқланди.
Концепцияни амалга ошириш режаси ШҲТ доирасида энергия хавфсизлиги, қайта тикланувчи энергия манбалари ва гидроэнергетика, минтақавий электр энергияси бозори, инсон капиталини ривожлантириш соҳаси каби ҳамкорликни ўз ичига олади.
ШҲТга аъзо давлатларнинг қайта тикланувчи энергетика бўйича ҳамкорлиги дастури қайта тикланувчи энергия манбалари соҳасида инновацион технологиялар ва илм-фанни ривожлантириш, яшил энергетикани ривожлантиришни рағбатлантириш, қайта тикланувчи энергия манбалари ҳажмини ошириш ва иссиқхона газлари чиқиндиларини камайтириш, шунингдек, атроф-муҳитга антропоген юкнинг камайиши, энергия хавфсизлиги ва энергия таъминоти ишончлилиги даражасининг ошишини назарда тутади.
Таъкидлаш жоизки, Шанхай Ҳамкорлик Ташкилотига аъзо давлатлар энергетика вазирларининг иккинчи йиғилиши 23-24 июнь кунлари бўлиб ўтаётган “Ўзбекистон энергетика форуми – UEF 2022”нинг асосий тадбирига айланди.
Форум доирасида Тошкентда “Ўзбекистон нефть ва гази – OGU” 24-халқаро конференцияси ва 2-халқаро энергетика конференцияси бўлиб ўтди.
Ўзбекистон Республикаси
Энергетика вазирлиги Матбуот хизмати
707
