Аввал хабар берилганидек, Тошкент шаҳрида “Ўзбекистон энергетика форуми – UEF 2022” ўтказилмоқда. Форумда Озарбайжон, Буюк Британия, Германия, Италия, Қозоғистон, БАА, Россия, Саудия Арабистони, АҚШ, Ўзбекистон, Франсия, Япония каби 15 дан ортиқ мамлакатдан маърузачилар, 200 дан ортиқ делегатлар, соҳа мутахассислари ва экспертлар иштирок этмоқда.
“Ҳудудий электр тармоқлари” АЖ бошқарув раисининг биринчи ўринбосари Ж. Обиджонов ҳам Форум доирасида ташкил этилган “Электр энергетика соҳасини ўзгартириш” мавзуидаги сессияда ўз маърузаси билан қатнашди.
Таъкидланганидек, Жамият фаолиятидаги устувор йўналишларидан бири, шубҳасиз, истеъмолчиларга сифатли электр энергияси етказиб бериш, шу билан бирга, Президентимиз ва ҳукумат томонидан белгиланган соҳага оид вазифалар ижросини таъминлаш, хизмат кўрсатиш сифатини янада ошириш бўлиб, бу борада Жамият томонидан кейинги йилларда салмоқли ишлар олиб борилаётир. Айни пайтда, фаолиятга инновацион ечимларга асосланган замонавий технологияларни кенг жорий этишга алоҳида эътибор қаратилмоқда.
Дарҳақиқат, бугун рақамли технологияларсиз жамият тараққиётини тасаввур этиб бўлмаганидек, электр энергияси тизимини трансформация қилмай, иш жараёнларига инновацион технологияларни татбиқ этмай туриб соҳа ривожига эришиб бўлмайди. Шу тариқа, трансформация воситасида соҳани ривожлантириш, очиқ-ошкора фаолият юритиш, истеъмолчиларга электр энергияси етказиб бериш тизимини замонавийлаштириш эвазига халқаро рейтингларни қоълга киритиш имконияти пайдо бўлади.
Жамият томонидан бугунги кунда ана шундай янгича ёндашув асосида, хориж тажрибасини ҳар томонлама ўрганган ҳолда ишлар ташкил этилиб, хусусан, халқаро аудит корхоналарининг тегишли баҳоларини олиш бўйича жаҳонда тан олинган «катта тўртлик» аудиторлик компаниялари билан музокаралар олиб борилмоқда.
"Ҳудудий электр тармоқлари" АЖ Матбуот хизмати
479
