2022 йилнинг 5 июль куни Ўзбекистон Республикаси Энергетика вазирлигида Озарбайжон Республикасининг “SOCAR” компанияси делегацияси аъзолари билан музокаралар бўлиб ўтди.
Компания вакиллари билан учрашувда ўзаро манфаатли ҳамкорликнинг қатор йўналишлари муҳокама қилинди.
Томонлар, хусусан, тажриба алмашиш ва кадрлар тайёрлаш соҳасида ҳам фаол ҳамкорлик қилмоқда.
Шундай қилиб, 2021 йил сентябрь ойида “Ўзбекнефтгаз” АЖ мутахассислари Озарбайжонга ишчи сафари чоғида “SOCAR” компаниясида дастурий модулларни босқичма-босқич жорий этиш билан ресурсларни бошқариш тизими, диспетчерлик бошқаруви тизими, ишларни автоматлаштириш, ишлаб чиқариш жараёнларини мониторинг ва назорат қилиш соҳасидаги ечимларни ўрганди.
Айни пайтда углеводородларни илғор қайта ишлаш соҳасида кадрлар тайёрлашни ташкил этиш мақсадида “SOCAR” мутахассисларининг “Ўзбекнефтгаз” АЖга қарашли газ-кимё мажмуаларига ташрифи режалаштирилмоқда.
Учрашувда “SOCAR” вакиллари “Ўзбекнефтгаз” АЖнинг 10 нафар мутахассисини “SOCAR” корхоналарига малака оширишга қабул қилишга ва 2 нафар ходимга “SOCAR” олий мактаби магистратура босқичида ўқиш учун стипендия ажратишга тайёрлигини маълум қилди.
Томонлар Озарбайжонда углеводородларни биргаликда қидириш ва қазиб олиш имкониятларини ҳам қайд этдилар. Таъкидлаш керакки, ушбу йўналишда қатор изланишлар олиб борилмоқда.
Муҳокама чоғида Дубайда савдо уйини очиш бўйича ишларни жадаллаштириш юзасидан келишувга эришилди, бу эса ҳар икки томоннинг янги бозорларга янада фаол киришига имкон беради.
Шунингдек, “SOCAR” билан ДХШ асосида қайта тикланувчи энергия манбалари асосида ишлаб чиқариш бўйича йирик лойиҳаларни тайёрлаш ва амалга ошириш юзасидан тажриба алмашиш, шунингдек, тегишли тендерларни ўтказиш тўғрисида қарор қабул қилинди.
Ўзбекистон Республикаси
Энергетика вазирлиги Матбуот хизмати
714
