“Ўзгидромет”нинг хабар беришича, жорий йилнинг 17-22 июль кунлари Ўзбекистон ҳудудига Туркманистон орқали Эрон ҳудудларидан иссиқ ҳаво кириб келиши кучайиши сабабли кундуз кунлари айрим ҳудудларда ҳаво ҳарорати +47 даражагача кўтарилиши кутилмоқда.
Маълумки, ҳаво ҳароратининг кескин кўтарилиши натижасида электр энергиясига бўлган талаб ҳам кескин ошади. Бунинг натижасида, электр тармоқлари ва трансформатор пункларида юклама ортиши ва натижада тармоқда носозликлар келиб чиқиши мумкин.
Шу мақсадда, Энергетика вазирлиги ва вазирлик тизимидаги барча ташкилотлар томонидан ҳаво ҳароратининг кескин кўтарилиши кунларида истеъмолчиларга энергия ресурсларини барқарор етказиб бериш чоралари кўрилмоқда.
Хусусан, ушбу кунларда электр энергиясини ишлаб чиқарувчи станцияларда захира энергоблоклари ишга қўшилади. Электр энергияси етказиб бериш сифатини ошириш мақсадида жорий йил бошидан 2 минг километрдан ортиқ электр узатиш тармоқлари ва 330 дан ортиқ трансформатор пунклари янгиланди.
Бундан ташқари паст кучланишли 17 минг километрдан ортиқ электр узатиш тармоқлари ва 6 мингга яқин трансформатор пункти, шунингдек 110-500 кВ кучланишли 600 километрдан ортиқ электр узатиш тармоғи ва 7 та куч трансформаторлари мукаммал таъмирланди.
Барча электр станцияларда 24 соатлик навбатчилик гуруҳлари ташкил этилди. Бунинг натижасида ишлаб чиқариш қувватлари барқарорлиги таъминланади. Худди шунингдек, электр тармоқларида фавқулодда ҳолатларни олдини олиш ва уларни бартараф этиш мақсадида ҳудудлар бўйлаб туну-кун ишлайдиган 227 та аварияга қарши бригадалар ташкил этилди.
Азиз Ватандошлар! Республикамизда ҳаво ҳароратининг аномал даражада исиши натижасида электр қурилмаларида ортиқча юклама туфайли юзага келиши мумкин бўлган носозликларни олдини олиш мақсадида сизлардан электр энергиясидан тежамкорлик билан, шунингдек, имкон қадар совутиш қурилмаларидан оқилона фойдаланишингизни, зарур бўлмаганда электр қурилмаларини тармоқдан ажратиб қўйишингизни сўраймиз.
Ушбу вазиятни тўғри тушунган ҳолда энергия ресурсларидан оқилона фойдаланишимиз натижасида электр қурилмаларининг узоқ муддатга ишдан чиқишини олди олган бўламиз ҳамда энергия ресурсларини барча истеъмолчиларга барқарор етиб борилишига муносиб ҳисса қўшган бўламиз.
Таъкидлаш керакки, бу каби ҳолатларда жаҳон тажрибасида ҳукумат томонидан халққа энергия ресурсларидан оқилона фойдаланиш ва электр энергияси истеъмолини имкон қадар қисқартириш юзасидан мурожаатлар қилинади.
Ижтимоий тармоқлар ва оммавий ахборот воситаларида айниқса, Европа ва Осиёнинг ривожланган давлатларида бу каби мурожаатларни кўплаб кузатмоқдамиз.
1. Техас штати https://ourtx.com/archives/72692
2. Европа иттифоқи https://nokta.md/evrokomissiya-chtoby-strany-es-ogranichili-do-19-gradusov-temperaturu-v-obshhestvennyh-zdaniyah/
3. Япония https://www.theweek.in/news/world/2022/06/28/government-asks-residents-to-conserve-power-as-tokyo-battles-a-heatwave.html
4. Хитой https://www.scmp.com/economy/economic-indicators/article/3185160/china-heatwave-prompts-energy-curbs-manufacturing-hub ва ҳоказо.
Шу ўринда истеъмолчилардан электр энергияси таъминоти юзасидан 11-54 қисқа рақами ёки Telegram’даги (@HET_admin) админстраторга мурожаат қилишларини сўраймиз.
Ўзбекистон Республикаси
Энергетика вазирлиги Матбуот хизмати
1731
