Жорий йилнинг 20 июль куни “Ҳудудий электр тармоқлари” АЖ, Тошкент давлат техника университети ҳамда “UzAssystem” LLC қўшма корхонаси МЧЖ ўртасида уч томонлама ўзаро англашув меморандуми имзоланди.
Тадбирда Осиё тараққиёт банки вакиллари, университет олим ва ўқитувчилари, “UzAssystem” LLC қўшма корхонаси ходимлари, соҳа мутахассислари ҳамда оммавий ахборот воситалари вакиллари иштирок этди.
Жамият бошқарув раиси ўринбосари Жаҳонгир Обиджонов тадбирни кириш сўзи билан очар экан, мазкур меморандум ташкил этилаётган ўқув марказида янги технологиялар ва инновацион ўқув методикаларини жорий қилиш орқали соҳа кадрларини тайёрлашга кенг йўл очиши ҳақида тўхталиб ўтди.
Англашув меморандумини имзолашдан кўзланган асосий мақсад электр энергетика тизимида малакали кадрлар тайёрлаш тизимини такомиллаштиришдан иборатдир. Бугунги кунда соҳада жорий этилаётган технологиялар билан “тиллаша” оладиган ёш авлодни тарбиялашда мазкур англашув меморандумида назарда тутилган вазифалар муҳим роль ўйнайди, – дейди Ж. Обиджонов. – Маълумки, сўнгги йилларда бошқа соҳаларда бўлгани каби, энергетика соҳасида электр энергиясини ишлаб чиқариш, узатиш, тақсимлашда бир қатор янги замонавий технологиялар жорий этилди. Хусусун, “Ҳудудий электр тармоқлари” АЖ таркибидаги корхоналарда ҳам бу каби ишлар тизимли амалга оширилмоқда. Шундан келиб чиққан ҳолда, мазкур амалга оширилаётган ишлар натижадорлиги ва самарадорлигини ошириш ҳамда тизимда фаолият олиб бораётган кадрлар сифатини ошириш мақсадида, Осиё тараққиёт банки ҳомийлигида Тошкент давлат техника университети ҳузурида “Ҳудудий электр тармоқлари” АЖ ўқув маркази ташкил этилишига келишиб олинди.
Таъкидлаш жоизки, Марказ замонавий ахборот ва техник қурилмалар билан таъминланиши режалаштирилган бўлиб, бу ерда талабаларга ҳамда тизимдаги ёш ишчи-ходимларга электр тармоқларини лойиҳалаштириш йўналишида қўлланилаётган замонавий дастурларда ишлаш, шу билан бирга бакалавриат таълим йўналишлари ва магистратура мутахассислиги ўқув режаларини ишлаб чиқариш корхоналари талаблари асосида нафақат шакллантириш, балки мазкур фанларни талаб даражасида юқори савияда олиб бориш учун барча шарт-шароитлар яратилади.
Тадбир доирасида “UzAssystem” LLC қўшма корхонаси томонидан DigSilent моделлаштириш ва режалаштириш дастурий таъминоти тақдимоти ўтказилди.
“Ҳудудий электр тармоқлари” АЖ Матбуот хизмати.
839
