Mamlakatimizning tabiiy gazni chuqur qayta ishlash salohiyatini kengaytirish, uglevodorod xomashyosi importini tubdan kamaytirish, shuningdek respublikamizning energetika mustaqilligini mustahkamlash maqsadida barpo etilgan “GTL” zavodi bugun neft va gaz sanoatini rivojlantirish uchun yangi imkoniyatlar eshigini ochmoqda.
O‘zbekistondagi eng yirik investitsion loyihalardan biri bo‘lgan “Uzbekistan GTL” zavodi mamlakatimiz sanoatini rivojlantirishda yangi bosqichni boshlab beradi. Prezidentimiz Shavkat Mirziyoyev tashabbusi bilan ushbu loyiha qisqa vaqt ichida hayotga tadbiq etildi.
Avval xabar qilinganidek, 2022 yil 29-iyun kuni “O‘zbekneftgaz” AJ “Uzbekistan GTL” zavodi O‘zbekiston neft-kimyo sanoati tarixidagi birinchi sintetik dizel mahsulotlari ishlab chiqarilganligini rasman eʼlon qildi. Shuningdek, iyun oyida O‘zbekiston tarixida ilk marta “Uzbekistan GTL” zavodida sintetik neft ishlab chiqarish yo‘lga qo‘yildi.
Ishlab chiqarishni mahalliylashtirish va kengaytirish doirasida 2022 yil 22 iyul kuni Buxoro neftni qayta ishlash zavodida sintetik “GTL” naftasining birinchi partiyasi qabul qilingan bo‘lib, undan avtomobil benzinining mashhur rusumlarini ishlab chiqarish yo‘lga qo‘yiladi.
Buxoro neftni qayta ishlash zavodiga har oyda 5 ming tonna “GTL” sintetik naftasi qabul qilish rejalashtirilgan. Ishlab chiqarilgan mahsulotlar, birinchi navbatda, respublikaning neft mahsulotlariga bo‘lgan ichki ehtiyojlarini qoplash uchun yetkazib beriladi.
Maʼlumot uchun taʼkidlash joizki, “GTL” naftasi neft va kimyo sanoati va uning eng muhim jarayoni hisoblangan bug‘li krekingi uchun qimmatbaho xomashyodir. “GTL” naftasining samaradorligi shundan iboratki, u xomashyo sifatida ishlatilganda mahsulot hajmi va yakuniy mahsulot sifati oshadi. Neftni qayta ishlash zavodlarida ishlab chiqarilgan neft negizidagi naftaga nisbatan “GTL” naftasining tarkibida parafinik uglevodorodlar miqdori yuqori, aromatik moddalar miqdori esa – pastdir.
Elatib o‘tamiz, “Uzbekistan GTL” zavodidan 10 tonnalik sintetik dizel yoqilg‘isining birinchi partiyasi suv arkalari orqali Navoiy kon-metallurgiya kombinatiga jo‘natilgan edi.
“O‘zbekneftgaz” AJ Matbuot xizmati
1427
