Joriy yilning 29-iyul kuni “O‘zbekko‘mir” aksiyadorlik jamiyatiga matbuot anjumani va press-tur tashkil etildi.
Unda qattiq yoqilg‘i qazib chiqarish, saralash va yuklash jarayonlari, bu boradagi ko‘rsatkichlar, sifat bo‘yicha amalga oshirilayotgan ishlar xususida axborotlar berildi.
− Jamiyatimiz tomonidan 2022/2023 yillar kuz-qish mavsumi uchun Respublika ijtimoiy soha obyektlariga 518 ming tonna, aholi ehtiyojlari uchun 882 ming tonna mahalliy ko‘mir mahsulotlari yetkazib berish rejalashtirilgan, − dedi bosh direktorning birinchi o‘rinbosari A.Mirahmedov. − Ijtimoiy soha ob’yektlariga ko‘mir yuklash ishlarini bu yil har galgidan ancha barvaqt − 1-apreldan boshlandi. Ayni paytda jamiyat tomonidan kuniga o‘rtacha 3 ming tonna ko‘mir yuklab jo‘natilmoqda. 2022-yil 27-iyul holatiga byudjet tashkilotlari uchun 326,3 ming tonna mahalliy ko‘mir ortib yuborildi. Ko‘mir tarqatish ishlari ayniqsa Samarqand va Xorazm viloyatlarida namunali tashkil etilmoqda.
Respublika byudjet tashkilotlarini kuz-qish mavsumi uchun ko‘mir bilan to‘liq ta’minlash ishlarini 15-sentyabrga qadar yakunlash, aholini mahalliy ko‘mir bilan ta’minlashni esa 31-dekabrgacha tugatish rejalashtirilgan.
Muloqot jarayonida ta’kidlanganidek, Respublika byudjet tashkilotlari va aholi uchun mo‘ljallangan mahalliy ko‘mir BR-2 markali bo‘lib, fraksiyasi 0-300 mm.ni, kulchanligi 17 foizni tashkil etadi.
Ma’lumot uchun, “O‘zbekko‘mir” aksiyadorlik jamiyati tomonidan 2022 yilda iste’molchilarga 4,8 million tonna ko‘mir yetkazib beriladi. Birinchi yarim yillik davomida 2,4 mln. tonna (prognozga nisbatan 97,1 foiz) ko‘mir qazib chiqarildi. Bu o‘tgan yilning mos davriga nisbatan o‘sish sur’ati 110,4 foizga tengdir.
“Angren” ko‘mir koni “O‘zbekko‘mir” AJning qattiq yoqilg‘i qazib chiqaruvchi asosiy koni hisoblanib, 2022-yilda ushbu konda 4328,7 ming tonna ko‘mir qazib olish belgilangan. Ayni kunlarda bu yerda 40 dan ortiq kon ekskavatoridan foydalanilmoqda. Ularning to‘rttasi bevosita ko‘mir qazib olish va yuklash ishlariga safarbar qilingan.
Muloqot chog‘i jurnalistlar va blogerlarni o‘zlarini qiziqtirgan savollarga atroflicha javoblar oldilar.
Kunning ikkinchi yarmida “Angren” ko‘mir koniga press-tur uyushtirildi. Jurnalist va blogerlar ko‘mir qazib olish, saralash va yuklash jarayonlari bilan yaqindan tanishdilar.
“O‘zbekko‘mir” AJ Matbuot xizmati
1158
