Kommers.uz sayti va bakiroo telegram kanali asoschisi Otabek Bakirov Energetika vaziri o‘rinbosari Sherzod Xodjayev bilan katta intervyu uyushtirdi. Ushbu intervyuning qisqa-qisqa variantlarini taqdim etib boramiz.
Otabek Bakirov: Menimcha, bugungi suhbatimizning o‘rni, ahamiyati boshqacharoq. Sababi, 10 kundan beri respublikamizda anomal issiq kuzatilyapti. O‘tgan yilgi iyul oyining boshida kuzatilgan anomal issiq 3 kun davom etgan bo‘lsa, hozir mana bugun 10-kun anomal issiqning O‘zbekiston hududidan chiqib ketishi qiyin bo‘layapti. Bu jaziramaga O‘zbekiston energetikasi qanday bardosh berayapti, nima muammolar bor?
Sherzod Xodjayev: “Ochig‘ini aytish kerak, anomal issiq energoqurilmalarimizga o‘zining salbiy ta’sirini ko‘rsatayapti. Va energoqurilmalarimizning eskirish darajasi ancha yuqori bo‘lganligi tufayli juda ko‘p holatlarda o‘ta yuklamaga dosh berolmayapti.
Oddiy til bilan aytganda, har bir xonadonda, har bir tashkilotda, har bir muassasada qo‘shimcha kondisionerlar ishga tushirilgandan keyin bizning toransformatorlarimiz, kabellarimiz va nimstansiyalarimiz bu yuklamaga dosh berolmay, juda ham ko‘p avariaviy o‘chishlar bo‘ldi.
Ochig‘ini aytish kerak, avariyaga qarshi kurashadigan brigadalarimiz 24 soat ishda, quyi bo‘g‘indagi elektromontyorlarimiz haqiqatda juda charchagan. Lekin bizning vazifamiz bu narsani kechib o‘tishimiz kerak. Albatta, xulosa chiqarishimiz kerak. O‘ylaymanki, hozirgi kunda bizning mijozlarimiz bizdan rozi emas. Chunki, qish oylarida biz ko‘proq mijozlarimizni qiynardik. Lekin bahor, yoz va kuz oylarida bu kabi ko‘p e’tiroz bo‘lmas edi. Bu yil e’tiroz juda ham ko‘payib ketdi.
Albatta, anomal issiq buning sabablaridan biri. Lekin asosiy sababi emas. Buni ham ochiqcha tan olishimiz kerak. Ya’ni, har qanday energotizim qaysi mamlakatda bo‘lishidan qat’iy nazar mana shunday anomal issiqqa ham anomal sovuqqa ham mustahkamlik bo‘yicha zahirasi bo‘lishi kerak, chidashi kerak. Aynan vazifasi ham shu. O‘n kun emas, 20, 30, 40 kun issiq bo‘lsa ham chidab berishi kerak. Shunga asosan loyihalashtirilishi, qurilishi, ekspluatasiya qilinishi va eng asosiysi shunga asosan rivojlantirib borilishi kerak.
Bizda mana shu oxirgi ikkitasida muammo bor. Bizga murojaat qilgan odamlarning asosiy e’tirozlaridan biri ochiqcha aytish kerak, mana sovet paytida qurilgan, deb bahona qilaverasizlar, xuddi sovet paytida qilingan narsalar yomondek, aslida sovet paytida shu qurilmalar yaxshi ishlagan edi, bunchalik avariya bo‘lmas edi, degan e’tiroz bildirishadi.
To‘g‘ri, lekin Sovet paytida masalan, mening ham bolaligim ko‘p qavatli uyda o‘tgan. 56 ta kvartira bo‘lsa, men eslayman, 4 ta kvartirada kondisioner bor edi. Shu ko‘p qavatli uyga tortib kelingan kabel ham Sovet vaqtida o‘rnatilgan transformator ham mana shularni hisobga olib qilingan.
Bugungi kunda borib sanasangiz 4 ta kondisioner emas, 44 ta kondisioner chiqadi. Albatta, yangiligida bu kabel bunday yuklamaga chidamas edi. Sovet paytidan buyog‘iga ham 30 yildan oshiq vaqt o‘tib ketdi. Ya’ni, eskirish darajasi bor. Va o‘ylaymanki, bir tomondan albatta e’tirozlar o‘rinli, bizga nisbatan qandaydir o‘zimizning rejalarimizni qayta ko‘rib chiqishimizga undasa, ikkinchi tomondan xohlaymizmi, xohlamaymizmi jamiyatni ham tayyorlaydi. Islohotlar bu kechiktirib bo‘lmaydigan narsa. Energetikada islohotlar qilmasak, vaziyat yildan yilga yomonlashsa yomonlashadiki, yaxshilashga xizmat qilmaydi”.
476
