Энергия тежовчи технологиялар нафақат глобал миқёсда, балки деярли ҳар бир хонадон, ҳар бир оила учун муҳимдир. Улардан фойдаланиш табиий ресурсларни тежашга имкон берибгина қолмай, энергия истеъмоли сарфини камайтириш ва ҳар қандай вақтда ас қотиши мумкин бўлган маблағни тежашга имкон беради. Маиший турмушда фойдаланилаётган табиий газ ҳам бундан истисно эмас ва унга бўлган эҳтиёж йилдан-йилга ўсиб бормоқда.
“Зангори ёқилғи”дан янада оқилона фойдаланиш ва келажакда унинг этишмаслигидан азият чекмаслик учун, ҳозирдан бу ҳақида қайғуриш лозим. Янада аниқроқ айтганда, бутун ишлаб чиқариш жараёнидан бошлаб, ҳар бир хонадондаги газ мосламаларини такомиллаштириш талаб этилади.
Ҳозирги кунда, ушбу масала билан “Ҳудудгазтаъминот” АЖнинг таркибий бўлинмалари фаол шуғулланишмоқда. Газ таъминоти ташкилотлари ходимлари ҳар бир истеъмолчига янги технологияларни жорий этишнинг самарадорлигини тушунтириб, аҳоли ўртасида тарғибот ишларни олиб бормоқдалар.
Навбатдаги тарғибот тадбири Тошкент шаҳрининг Чилонзор туманидаги “Катта Қозиробод” маҳалласида бўлиб ўтди. Хусусан, “Ҳудудгаз Тошкент шаҳар” мутахассислари табиий газ истеъмолини 30-35 фоизга камайтирувчи замонавий ва энергия тежамкор автоматик қозонлардан фойдаланишнинг афзалликларини кўрсатиб бердилар.
Ушбу маҳалланинг айрим фуқаролари хонадонларига энергия тежамкор қурилмалар ўрнатилди. Ахир, битта замонавий газ ёндиргич (горелка) бир ойда ўртача 255 - 300 кубометр газни тежашга имкон беради ва буни пулга чақсак ойига 96 - 133 минг сўмни ташкил этади.
Бундай замонавий тежамкор газ жиҳозларини сотиб олиш қийин эмас. Истеъмолчиларга қулайлик яратиш мақсадида, “Ҳудудгазтаъминот” АЖ томонидан мамлакатимизнинг деярли барча вилоятларида савдо шахобчаларини ташкил этишлари учун тадбиркорларга амалий ёрдам кўрсатилди. У ерда нафақат сертификатланган маҳсулотларни харид қилиш, балки тажрибали мутахассислардан керакли маслаҳатларни ҳам олиш мумкин. Бундан ташқари, газ таъминоти ташкилотлари ходимлари харид қилинган жиҳозларни хусусий хонадонларга ва ишлаб чиқариш объектларига ўрнатиш бўйича хизмат кўрсатадилар.
Янги замонавий газ ёндиргичларининг афзаллиги, кўплаб фойдаланувчилар томонидан аллақачон юқори баҳоланди. Мамлакатимиз бўйлаб, 20 мингдан ортиқ хусусий хонадонларда 24 696 дона ҳамда юридик шахсларга тегишли объектларда, асосан, тандирхоналар ва нонвойхоналарда 9538 дона табиий газ сарфини 60 фоизгача камайтиришга имкон берувчи тежамкор газ ёндиргич мосламалари ўрнатилган.
“Ҳудудгазтаъминот” АЖ матбуот хизмати
1558
