Joriy yilning 16-avgust kuni Energetika vazirligida O‘zbekiston Respublikasi Prezidenti huzuridagi Davlat xizmatini rivojlantirish agentligi masʼullari ishtirokida “Davlat fuqarolik xizmati to‘g‘risida”gi qonunning mazmun-mohiyati yuzasidan tadbir bo‘lib o‘tdi.
Unda taʼkidlanganidek, joriy yilning 8-avgust kuni O‘zbekiston Respublikasi Prezidenti davlat organlari va tashkilotlarida mehnat qilayotgan 118 ming nafardan ortiq davlat fuqarolik xizmatchilarining huquqiy maqomini belgilovchi va ular faoliyatini yagona qoidalar asosida huquqiy tartibga soluvchi “Davlat fuqarolik xizmati to‘g‘risida”gi qonunni imzoladi.
Qonun bilan davlat fuqarolik xizmati sohasidagi ijtimoiy munosabatlarni tartibga soluvchi umumiy qoidalar, davlat organlarining asosiy vazifa va vakolatlari, davlat fuqarolik xizmatchilarining maqomi, huquq va majburiyatlari, huquqiy va ijtimoiy himoyasining kafolatlari, davlat fuqarolik xizmatiga kirish, uni o‘tash va tugatish asoslari hamda davlat fuqarolik xizmati tizimida korrupsiyaning oldini olish choralari belgilanmoqda.
Davlat fuqarolik xizmatining asosiy prinsiplari quyidagilardan iborat: davlat organlari va mansabdor shaxslarining jamiyat hamda fuqarolar oldida masʼulligi, qonuniylik, adolatlilik, xalqqa xizmat qilish, davlat fuqarolik xizmati tizimining yagonaligi va barqarorligi, davlat fuqarolik xizmatchilarining huquqiy va ijtimoiy jihatdan himoya qilinishi, davlat fuqarolik xizmatiga kirishda fuqarolarning teng huquqliligi, xolislik, professionallik va kompetentlik, ochiqlik va shaffoflik, inson huquqlari, erkinliklari va qonuniy manfaatlarining ustuvorligi.
Fuqaro davlat fuqarolik xizmati lavozimiga tayinlangan paytdan eʼtiboran davlat fuqarolik xizmatchisi huquqiy maqomiga ega bo‘ladi va faoliyati tugatilishi munosabati bilan uni yo‘qotadi.
Davlat fuqarolik xizmatchisi quyidagilarga majbur: Konstitutsiyaga va boshqa hujjatlarga rioya qilish, o‘z xizmat majburiyatlarini vijdonan bajarish va ichki tartib-qoidalarga rioya etish, manfaatlar to‘qnashuviga yo‘l qo‘ymaslik, beg‘araz va xolis bo‘lish, davlat sirlari yoki qonunchilik bilan ko‘riqlanadigan boshqa sirlarni muhofaza qilish to‘g‘risidagi talablarga rioya etish, daromadlari va mol-mulki to‘g‘risidagi deklaratsiyani taqdim etish, o‘z xizmat mavqeidan shaxsiy va boshqa g‘ayriqonuniy maqsadlarda foydalanmaslik, o‘zining kasbiy kompetensiyasini muntazam ravishda oshirib borish, davlat mulkining saqlanishini taʼminlash, o‘ziga ishonib topshirilgan davlat mulkidan faqat xizmat maqsadlarida foydalanish kabilanga majbur.
Davlat fuqarolik xizmatchisi quyidagilarga haqli emas: O‘zaro yaqin yoki quda tomondan qarindosh bo‘lgan shaxslar bilan aynan bitta davlat organida birga (o‘zaro bo‘ysunuv va nazorat osti) xizmat qilish, pedagogik, ilmiy va ijodiy faoliyatdan tashqari haq to‘lanadigan boshqa faoliyat bilan shug‘ullanish, tadbirkorlik faoliyati bilan shug‘ullanish, tadbirkorlik faoliyati subyektlarini tashkil etish, ularning muassisi (ishtirokchisi) bo‘lish, o‘z xizmat vakolatlarini bajarish yoki bajarmaslik evaziga biror bir mukofot, foyda yoki sovg‘alar olish, imtiyozlar va preferensiyalardan o‘z xizmat mavqei bilan bog‘liq holda foydalanish, chet davlat fuqaroligini olish, O‘zbekiston hududidan tashqarida hisobvaraqlarga ega bo‘lish, ko‘chmas va mol-mulkka egalik qilish.
Yig‘ilishda mazkur qonunni ishlab chiqish jarayonida xorij tajribasi va xalqaro ekspertlarning fikr-mulohazalariga tayanilgani alohida taʼkidlandi. Xususan, Yaponiya, AQSH, Buyuk Britaniya, Germaniya, Fransiya, Xitoy, Bolgariya, Latviya, Polsha, Estoniya kabi davlatlar, shuningdek, MDH davlatlari va boshqa mamlakatlarning qonunchiligi chuqur tahlil qilingan.
Qonun 10 ta bob va 64 ta moddadan iborat, u matbuotda eʼlon qilingan kundan eʼtiboran 3 oy o‘tgach kuchga kiradi.
Tadbir so‘nggida vazirlik va tizim tashkilotlaridan ishtirok etgan xodimlarning savollariga mutaxassislar tomonidan batafsil javoblar berildi.
O‘zbekiston Respublikasi
Energetika vazirligi Matbuot xizmati
1195
