Unda mamlakatimiz aholisi ehtiyoji uchun zarur jami elektr energiyasining 85 foizga yaqinini ishlab chiqaruvchi “Issiqlik elektr stansiyalari” AJ tomonidan 2022-2023-yillar kuz-qish mavsumiga tayyorgarlik doirasida amalga oshirilgan chora-tadbirlar, xususan taʼmirlash ishlari haqida so‘z bordi.
Maʼlum qilinishicha, tizim korxonalarida jami 30 ta shu jumladan, 12 ta energoblok, 1 ta turboagregat, 9 ta qozonagregati, 7 ta bug‘-gaz qurilmasi, 1 ta gaz-turbina qurilmasida taʼmirlash ishlari amalga oshirilishi ko‘zda tutilgan edi. Ammo, elektr stansiyalarning barqaror ishlashini taʼminlash maqsadida olib borilgan ishlar joriy yilning 1 iyul holatiga ko‘ra ortig‘i bilan bajarildi.
Birgina mukammal va joriy taʼmirlash jadvaliga asosan bugungi kunga qadar 54 ta energoblok, 31 ta qozonagregati, 6 ta turbogenerator va 8 ta bug‘-gaz qurilmalari taʼmirlandi. Shu kunga qadar 35-110-220-500 kV kuchlanishli kuch transformatorlarida 65 ta joriy va mukammal taʼmirlash ishlari, 35-110-220-500 kV kuchlanishli 290 ta o‘chirgich (havoli, moyli, elegaz), ajratgich, o‘lchov transformatorlari, releli himoya hamda avtomatika qurilmalarida kapital va joriy taʼmirlash ishlari amalga oshirildi. Mazkur yo‘nalishdagi joriy va mukammal sozlash ishlari davom etmoqda.
Taʼmir sifatli bajarilishini taʼminlash maqsadida elektr stansiyalar mutaxassislari qatorida “O‘zbekenergotaʼmir” AJ va “O‘zenergosozlash” MCHJ malakali mutaxassislari hamda Rossiyaning “Siloviye mashini”, “Kalujskiy turbinniy zavod” va “Taganrogskiy kotelostroitelniy zavod”, Yaponiyaning “Mitsubishi Hitachi Power Systems” konsorsiumi vakillari ham jarayonga jalb etildi.
-Energo uskunalarning texnik holatini, ularning faoliyatidagi mavjud kamchiliklarni joyida aniqlash va bartaraf etish maqsadida 151 ta metall laboratoriya sinovidan o‘tkazildi, 106 tasi to‘liq kimyoviy tahlil qilindi. Elementlarni aniqlashga qaratilgan 830 ta tekshiruv olib borildi,-deydi “Issiqlik elektr stansiyalari” AJ boshqaruvi raisining birinchi o‘rinbosari Bahodir Jurayev. - Mexanik xossalarini aniqlash uchun 733 ta metall namunalariga ishlov berildi va sinov bajarildi. 136 ta suv, elektrolit, reagentlar, 260 ta energetik moy mahsulotlarida, 72 ta kuchlanish transformatorlarida va 425 ta transformator moyida xromatografik tahlillar o‘tkazildi.
Anjumanda ta'kidlanganidek, bugungi kunda ishlab chiqarilgan elektr energiyasini yuqori kuchlanishli elektr tarmoqlariga sifatli uzatish muhim masala hisoblanadi. Shu maqsadda elektr stansiyalardagi 110-50 kV ochiq taqsimlash qurilmalari (OTQ) uskunalarining texnik holatini tekshirish maqsadida kuch transformatorlarida 72 ta, tok transformatorlarida 259 ta, kuchlanish transformatorida 129 ta, o‘chirgichlarda 97 ta, ajratgichlarda 345 ta, yuqori voltli kiritgichlarda 119 ta va aloqa kondensatorlarida 98 ta ish olib borildi.
Yana bir muhim masala shuki, “Issiqlik elektr stansiyalari” AJ tarkibidagi korxonalarda elektr energiyasi ishlab chiqarishda asosan tabiiy gazdan foydalaniladi. Shunday ekan, ishlab chiqarilgan elektr energiyasining sifati ko‘p jihatdan yoqilg‘i yetkazib berilishi sifatiga bog‘liq.
Hozirgi kunda elektr stansiyalarida tabiiy gaz taʼminoti tizimi uskunalarini ham kuz-qish mavsumida ishonchli va to‘xtovsiz ishlashini taʼminlash bo‘yicha ishlar olib borilmoqda. Jumladan, elektr stansiyalarning yoqilg‘i taʼminoti ishonchliligini taʼminlash maqsadida “Tolimarjon IES” AJ gaz tarmog‘iga qo‘shimcha gaz filtrlarini o‘rnatish, “To‘raqo‘rg‘on IES” UK bug‘-gaz qurilmalari gaz siqish kompressorlarini taʼmirlash ishlari yakuniga yetkazildi. “Navoiy IES” AJ va “Toshkent IES” AJda esa gaz o‘lchov qurilmalarini zamonaviy uskunalarga almashtirish hamda zamonaviy bug‘-gaz qurilmalari uchun tabiiy gaz filtrlari zahirasini yaratish ishlari olib borilmoqda.
Taʼmirlash ishlarining o‘z vaqtida va sifatli amalga oshirilishi ko‘p jihatdan xodimlar bilimi va malakasiga bog‘liq. Bu borada “Issiqlik elektr stansiyalari” AJ tomonidan “Yo‘l xaritasi” ishlab chiqilgan bo‘lib, xodimlar Germaniya, Fransiya, Italiya va Rossiya kabi xorijiy mamlakatlarning yirik energetika kompaniyalari ishlab chiqarish korxonalarida malaka oshirishmoqda.
Tadbir yakunida OAV vakillari, jurnalist va blogerlar o‘zlarini qiziqtirgan savollarga javob olishdi.
“Issiqlik elektr stansiyalari” AJ matbuot xizmati
980
