Avval xabar berganimizdek, “Talimarjon IES” AJda ikkinchi gaz uzatish tarmog‘idagi filtr separator o‘rnatish bo‘yicha olib borilgan ishlar yakunlandi. Mazkur ikkinchi filtrlovchi uskunaning o‘rnatilishi natijasida stansiyada sutkasiga jami 12 mln kub metr tabiiy gazni sifatli tozalangan holatda elektr energiyasi ishlab chiqarish jarayoniga yetkazib berish imkoniyati paydo bo‘ldi.
Ishga tushirilgan separatorlar orqali stansiyadagi kombinatsiyalashgan sikldagi bug‘-gaz qurilmasining ishonchli va to‘xtovsiz ishlashiga erishiladi hamda korxonadagi gaz kompressorlari to‘liq tozalangan gaz yoqilg‘isi bilan uzluksiz ravishda taʼminlanadi.
Gaz quvuriga ulangan filtrlash qurilmasi zamonaviy xorijiy uskunalarning xizmat muddati sezilarli ravishda uzaytirilishiga xizmat qiladi, ish unumdorligini oshiradi, shuningdek, uskunalarni joriy taʼmirlashga sarflanadigan mablag‘lar hajmi va importdan keltiriladigan materiallar sarfining kamayishiga ham yordam beradi.
– Mazkur qurilma stansiyada mavjud energobloklarga sifatli gaz yetkazib berish imkoniga ega, - deydi qozon-turbina sexi boshlig‘i Navro‘z Xolyorov. –Uni o‘rnatishdan asosiy maqsadimiz – elektr va issiqlik energiyasiga talab ortadigan kuz-qish mavsumida bug‘-gaz qurilmalarining barqaror hamda ishonchli ishlashini taʼminlashdan iborat.
Maʼlumot uchun, ayni kunlarda “Navoiy IES” AJda ham bug‘-gaz qurilmalarini kuz-qish mavsumida barqaror yoqilg‘i bilan taʼminlash maqsadida ikkinchi gaz-filtr separatorini o‘rnatish bo‘yicha ishlar olib borilmoqda.
“Issiqlik elektrstansiyalari” AJ Matbuot xizmati
832
