Energetika vazirligining Qayta tiklanuvchi energiya manbalari boshqarmasi boshlig‘i Abdullajon Otaboyev O‘zbekistonda quyosh va shamol elektr stansiyalarini qurish borasida amalga oshirilayotgan ishlar haqida ma’lumot berdi (videointervyu).
“Hozirda Respublikamizda quyosh va shamol elektr stansiyalarini qurish bo‘yicha 3 ta tender tanlovlari qizg‘in davom etyapti.
Birinchisi, bu Xalqaro moliya korporatsiyasi bilan birgalikda Buxoro, Namangan va Xorazm viloyatlarida umumiy quvvati 500 MVt bo‘lgan quyosh fotoelektr stansiyalari;
Ikkinchisi, Osiyo taraqqiyot banki bilan Qashqadaryo viloyatining Gʻuzor tumanida 300 MVt quvvatli quyosh elektr stansiyasi va energiya saqlovchi tizimlar;
Uchinchisi, Yevropa tiklanish va taraqqiyot banki bilan Qoraqalpog‘iston Respublikasida 200 MVt quvvatli shamol elektr stansiyasini qurish bo‘yicha tender tanlovlarimiz davom etyapti.
Joriy yilning oxiri va keyingi yil boshlarida mazkur 3 ta tanlovlarimiz yakunlanadi va investorlar aniqlanadi.
Yangi loyihalar bo‘yicha ham yer maydonlarini o‘rganib boryapmiz. Masalan, hozir Farg‘ona viloyatida 100 MVt quvvatli quyosh fotoelektr stansiyasini qurish bo‘yicha hamda Jizzax viloyatining Yangiobod tumanida gibrit usulidagi innovatsion yirik quvvatli quyosh va shamol energiyasidan foydalangan holda stansiya qurish bo‘yicha juda ham murakkab tahlillar olib borilmoqda”, — dedi Abdullajon Otaboyev.
827
