Joriy yilning 12- sentyabr kuni Oila va xotin-qizlar davlat qo‘mitasi tomonidan “Ayolga saodat bering” nomli ijtimoiy roliklar tanlovining taqdirlash marosimi o‘tkazildi.
Tanlovda qo‘mita tomonidan bugungi kunda tashkilot, korxona va muassasalarda ishlayotgan xotin-qizlarning mehnat huquqlarini himoya qilish, ijtimoiy-siyosiy faolligini oshirish maqsadida 124 ta markaziy muassasalar hamda 18 ming 751 ta korxona va tashkilotlarda xotin-qizlar masalalari bo‘yicha boshlang‘ich tashkilotlar faoliyati yo‘lga qo‘yilgani alohida taʼkidlandi.
Qayd etilganidek, mazkur tanlovga 54 ta vazirlik va idoralar tomonidan tayyorlangan 70 dan ortiq videoroliklar taqdim etilgan bo‘lib, shundan 10 ta nominatsiya bo‘yicha rag‘batlantiruvchi va faxrli o‘rin sohiblari aniqlandi.
Quvonarlisi, mazkur tanlovda Energetika vazirligi va tizim tashkilotlari sohada xotin-qizlarning o‘rni va ularga ko‘rsatilayotgan yuksak eʼtibor aks etgan videoroliklar bilan munosib ishtirok etib, faxrli o‘rinlarni egalladi.
Fursatdan foydalanib, yoqilg‘i-energetika kompleksi korxonalarida mehnat qilayotgan barcha xotin-qizlarni yuksak eʼtirof bilan muborakbod etamiz.
O‘zbekiston Respublikasi
Energetika vazirligi Matbuot xizmati
460
