Joriy yilning 12-13-sentabr kunlari Innovatsion rivojlanish vazirligi tomonidan Sirdaryo viloyatining Guliston shahrida “INNO Week-2022” hududiy ko‘rgazmasi tashkil etildi. Unda 120 dan ortiq oliy o‘quv yurtlari, kollejlar, xususiy taʼlim muassasalaridan ishtirokchilar qatnashib, O‘zbekistondagi eng yaxshi innovatsion loyihalar uchun bellashishdi.
Tadbir doirasida, “Techno Ways” texnologik rivojlanish marafoni tashkil etilib, unda Shirin energetika kolleji o‘quvchisi Akmaljon Toshtemirov “Arximed vint turbinali gidroelektr stansiya” innovatsion loyihasi bilan qatnashib, faxrli 2-o‘rin sohibi bo‘ldi.
Mazkur tadbir har yili o‘tkazilib unda turli nufuzli o‘quv yurtlaridan kelgan yosh bilimli salohiyatli o‘quvchi va talabalar ishtirok etadi.
Tadbirda turli universitet va texnika kollejlarining texnologiya, kimyo va energetika sohalarida yangi ijod namunalarini namoyish etish imkoniyati yaratiladi.
Taqdimotda ikkita loyiha – Shamol turbinasi va Gidroturbina loyihalari qo‘llab-quvvatlandi. Ushbu prototiplar elektr energiya ishlab chiqarishda innovatsion g‘oyaligi bilan ishtirokchilarni hayratda qoldirdi.
Marafonning xalqaro eksperti sifatida Saudiya Arabistonining “Nomac” kompaniyasi loyiha menejeri, janob Hossam Ahmad Hassanein ham ishtirok etdi. U so‘nggi yillarda yurtimizda taʼlim sohasiga berilayotgan alohida eʼtibor natijasida erishilayotgan yutuqlar yuzasidan o‘zining iliq fikrlarini bildirdi.
Shuningdek, ACWA Power kompaniyasi hududiy direktori, janob Abid Malik Xussain, ACWA Power Sirdarya kompaniyasi bosh direktor o‘rinbosari Alimardon Abdukarimov hamda Shirish energetika kolleji direktori Alfarobi Husanovдфк ishtirok etdi.
Eslatib o‘tamiz, joriy yilning 15-iyun kuni Prezidentimiz Shavkat Mirziyoyev raisligida bo‘lib o‘tgan videoselektor yig‘ilishida davlatimiz rahbari mazkur Shirin energetika kollejidagi tajribaga alohida to‘xtalib, ijobiy fiklarini bildirgan edilar.
O‘zbekiston Respublikasi
Energetika vazirligi Matbuot xizmati
1561
